Chanmari FC-in Electric Veng an lehthal

Chanmari FC chuan I Day Football bul ṭan nan Electric Veng FC hnehin bul an ṭan a, 2-1 in an chak. Vawiin hian inkhel a awm dawn lo a, August 4, Ninganiah group B te an inkhel ang.

Nimin Lammual inkhelah Amos Lalnienga hmangin minute 63-naah Electric Vengin hma an hruai a, Chanmari FC-in Lalhriatpuia leh Lalnunzira Sailo te goal hmangin an lehthal.

Transfer laia thawm nei ring Chanmari lamin inkhel an thunun a, chance ṭha insiam erawh an harsat. Chanmariin an player hlui Malsawmzuala an lalet a, Chaltlang tlangval hi captain-ah hmangin second half-ah goal a khung teuh hle.

Minute 63-naah Electric Veng wing back C. Lalnunmawia ball vawrh luh chu Chanmari defen-der Lalbiaknia Royte-in keeper pek tumin a tauh let a, amaherawhchu EFC substitute Lal-chhuansanga'n keeper Lalrinzuala pet khalhin goal ban a pet per a, hemi per hi Amos-a'n goal-ah a chantir.

EFC goal hian Chanmari a beng harh a, minute 77-naah Zakaria Lalhriatpuia cross chu Lalhriatpuia'n siphurh sut nan a hmang. Chanmari an phur zui a, left back Lalremruata Ralte a che ṭha. Remruata hian minute 85-naah ṭha zetin a lalut a, a cross ball chu Lalnunzira Sailo-in chakna goal khung nan a hmang.

Electric Vengin point theihna hun ṭha an bawh pelh a, semifinal lut tur chuan an insiam ṭhat ran a pawimawh. August 6, Inrinni hian EFC hian Mizoram Police an hmachhawn dawn a, Chanmari FC-in Chhinga Veng an hmachhawn thung ang.