Goal sarih luhna inkhelah Bayern an chak

Robert Lewandowski-a goal hnih khung hmangin Bayern Munich chuan Hoffenheim 4-3 a hnehin German Cup quarterfinal an lut a, German champion hian Bundesliga bakah cup inelna lamah pawh hmalam an pan zel.

Nilaini zan Allianz Arena-a inkhelah Bayern Lewandowski-a'n goal hnih a khung bakah Thomas Muller chuan goal khat thawh vein Benjamin Hubner-a'n anmahni lamah a ti lut palh bawk.

Hoffenheim an vanduai, minute riatna lekah Bayern defender Jerome Boateng-a own goal hmangin hma hruai zuk mah se an tlarhnung a pawp zui a, goal li an chhuah hnuah Munas Dabbur chuan goal hnih rawn khung ve leh mah se a tlai tawh.

Bayern Munich striker Robert Lewandowski-a'n a goal khung theih a chhunzawm zel, tun hnai maiah pawh Bayern tana a match hnuhnung panga zinga paliah chuan goal a khung vek; season kal laiah match 29 aṭangin goal 35 zet a khung tawh.

German champion Bayern manager Hans-Dieter Flick chuan, "Player ṭha an awm a, chung zingah chuan a ṭha bik an awm leh bawk. A ṭha bik zinga mi chu Robert Lewandowski hi a ni, ani a awm hi chuan goal kan khung ngei ang tih ka ring ṭhin," tiin a striker a rintawk thu a sawi.

Bundesliga hmahruaitu hian Pathianni zanah hna hautak thawh chhunzawm tur an nei nghal dawn, league lamah an elpui RB Leipzig an mikhual ang. Team pahnih inthlauhna hi point khat chauh a nih avangin inkhel pawimawh a ni ang.

German Cup quarterfinal an lut a, Bundesliga hmahruaitu an nih bakah Champions League lamah last 16 an lut tawh bawk. Bayern dinhmun a ṭha chho a, an player ṭha ṭhenkhat erawhin an contract an hmang zo hnaivai mek thung.

Manuel Neuer, Thomas Muller, Javi Martinez, David Alaba leh Thiago Alcantara ten Bayern tana contract an neih lai hi nakkumah a tawp mai tawh dawn a, tunah chuan contract pawtsei tura inremna a la awm rih lo.

Bayern sporting director Salihamidzic chuan, "Ngunthluk taka inbiakna neih mek a ni, hun rei vak lo hnuah inremna a awm theih a beiseiawm. Tunah chuan inkhelah kan rilru zawng zawng kan hmang a, contract chungchang hi hmanhmawh taka tih vut vut chi a ni hran lo," tiin contract ziah hmanhmawh lo mah se an inbiak mek thu a sawi.