Ramhlun South = Chhinga Veng ; College Veng 0 - 2 Chanmari
TṬ Royte Trophy - Inter Branch YMA Football Tournament semifinal thawhkhatnaah Ramhlun South leh Chhinga Veng te 1-1 in an in-hnehtawk a, nimin inkhel hnuhnung zawkah Chanmari vengin Rosang-liana leh Lalhriatpuia goal hmangin College Veng 2-0 in an hneh.
Kumin CYMA Football semifinal hi double leg-a khelh a nih avangin final lut tur a la hriat loh. June 21, Nilaini hian second leg khelh leh tur a ni a, inkhel boruak nung ṭha zawk hmuh tur a awm ang.
Goal khat ve ve
Semifinal ṭan hmain Ramhlun South leh Chhinga Veng inkhel tur boruak sang mah se khelmual chhungah erawh inkhel nung tak an pho chhuak thei lo.
First half-a khel ṭha zawk Ramhlun South-in Malsawmfela hmangin minute 23-naah hma an hruai a, MPL5 best player hian hla tak aṭangin goal hmahruai a khung a, Chhinga Veng keeper C. Sangtluanga a chefuh tawk lo. Team pahnihin goal chance an nei ve ve a, Ramhlun South chu chance ngah zawk an ni.
Chhinga Vengin second half-ah midfield tichak turin Lalsawmzela an dah lut a, substitution awmze nei a ni. Second half inkhel nung hret mah se goal a lut har a, Ramhlun South an ṭang tluan thei tura a lan hnuah S. Malsawmtluanga cross chu Lalnunsanga'n Chhinga Veng siphurh sut nana hmangin 1-1 in inkhel a tawp.
Coach inbeihna
Ramhlun South coach HC Zarzoliana chuan, "First half kan thunun a, kan chance neih ṭhat kan khung tam tawk loh kan tuar a. Hun tawp lamah khan kan inthlahdah hret a, goal kan chhuah phah. Inkhelh zawha hrehawm ti zawk chu keimahni kan ni a, hei hian team ṭha zawk kan ni tih a lantir a ni," tiin Vanglaini a hrilh.
Chhinga Veng coach Jonathan Lalbiakkima chuan, "First half kan khelh fuh loh chhan chu ruahsur vang a ni a, second half-ah kan che ṭha zawk. Tunah hian team ṭha zawk an la awm lo tih chu result aṭangin a hriat theih a, team ṭha zawk chu second leg kan khelh zawhah a hriat ang. ," tiin Ramhlun South coach a chhang let.
Final-ah Chanmari?
Chhum zin vangin Lammual inkhel hnuhnung zawk first half a hmuhnawm tawk lo. Amaherawhchu hun chanve hnu lam erawh goal chance a tam avangin a hmuhnawm a, Chanmari leh College Vengin chance ṭha an nei ve ve a, minute 90 chhunga concentration nei ṭha zawk Chawngthansanga hote 2-0 in an chak.
Minute 27-naah vei lam aṭanga Lalmalsawma Zote cross ball chu Rosangliana zawnah chiah tlain Chanmari forward hian mawi zetin a tauh goal a, hei hi first half-a team pahnih danglamna a ni.
Second half-ah College Vengin siphurh sut tuma nawr letin R. Laldanmawia leh B. Zoramthara te hmangin an rum ṭhaih a, inkhel hmuhnawm a ni. Thara freekick pet Chanmari keeper MS Dawngliana'n a dang ṭha a, hun harsa karah Chanmari tan Lalrinchhana leh C. Lalmuanawma te an ṭangkai viau bawk.
Chanmari-in goal venhim an tum a, goal nawr a ṭul hunah an chhuak ngam bawk. Lalnunzama'n goal ban tauh per mah se injury time-ah Rosangliana thawhrah sengin Lalhriatpuia'n chak nemnghehna goal a khung.
Chawngthansanga hoten injury time-a goal an khung avangin goal hnihin hma an hruai a, minute 90 khelh hmabak la awmah final lut turin an dinhmun a ṭha hle.
Semifinal
1st leg : Nimin Inkhel Result
Ramhlun South 1 - 1 Chhinga Veng
RAM : Malsawmfela 23'
CHH : Lalnunsanga 86'
College Veng 0 - 2 Chanmari
CHA : Rosangliana 27'; Lalhriatpuia 90+3'
2nd leg : June 21, Nilaini
01:00 AM Chanmari Vs College Veng
03:30 PM Chhinga Veng Vs Ramhlun South
Final - June 23, Zirtawpni