PVL Final Hunthar tan fimkhur a ngai dawn

Mizorama volleyball inelna lian leh ngaihhlut hlawh ber GIG Motors Pro Volleyball League chu zanin dar 8:00 hian hian R. Dengṭhuama Indoor Stadium, Mualpuiah a hmawr bawk a ni dawn. League hmahruaitu Chhinga Veng hmaa ding tur Hunthar Veng tan fimkhur a ngai dawn.

Chhinga Vengin a vawi khat nan PVL an khel a, heti chung hian an mikhual lo. Chhinga Veng hian league round-ah an khingpui an hneh fai vek a, zanina an hmachhawn tur Hunthar ngei pawh hi inkhel inhnehtawk takah 25-22, 30-28, 25-20 in an hneh tawh. Match li an khelha set hloh miah lo an nih avangin team khel ṭha tluang ber an ni chiang hle.

Chhinga Vengin set 15 an khelh tawhah India aiawha World Cup vawi thum khel tawh Mandeep Singh-a'n point 89 hlawh chhuakin tihsual vawi 29 chiah a nei, ani bakah hian India captain hlui Gurinder Singh an nei bawk.

Mandeep leh Gurinder te hi player langsar an ni chiang a, chutihrualin tualchhung player-te sawi hmaih a thiang lo. Captain Lalrinchhana Renthlei, setter David Lalramhmachhuana, Lallianmawia Pachuau leh Lalngilneiha te hi champion pui tham khawpa ṭha vek an ni.

Chhinga Veng ṭhatzia sawi rualin Hunthar hmasawn dan hmuh hmaih theih a ni bik lo. Hunthar hi an match hmasa bera an chak loh bakah an chesual nawn tawh lo. An chak loh ṭum pawh hian set tinah point 20 an hmu tling vek a, set hnihnaah phei chuan ṭum nga ngawt an deuce - an vanneih ni chu ni se la chuan chak thei an ni.

Hunthar Veng hian hliam vangin setter rinrawl Remsang­zuala an chhawr theih a beisei awm loh a, Chhinga Veng nen an inkhelh ṭuma langsar lo tak Sarang S Lal chuan an khelh hnuhnun vawi thumah team a ti chak tawh hle - point 65 thawk chhuakin 15 a paih - LG D3 Player of the Night a tan vawi hnih thlan a ni.

Sarang-a'n hma a sawn avangin Huntharin beisei an neih phah. Tihsual a nei tlem a, lehlam ball vuak a dang hnem thei hle bawk. PVL season hnihnaa Mizo player zinga point hlawh chhuak hnem ber ni lai Lalbiakmuana (62 points) a khelh ṭhat a pawimawh dawn bawk. Biakmuana leh Lalrinhlua ten tualchhung player dang an fuih phur a ṭul dawn.