Chhinga Veng FC-ah Mizoram coach

Santosh Trophy hnuhnung bera Mizoram team coach Lal­sangzuala Hmar chuan Chhinga Veng FC a zawm.

AFC B License nei coach Sanga hian season liam ta khan Mizoram Premier League-ah Chanmari FC a champion pui a, Chhinga Vengin season tharah nomawi chawi ngei tumin Mizo coach zinga tawnhriat nei ṭha ber zinga mi hi an lalut ta a ni.

Sanga hian MPL ṭantirh aṭangin Chanmari FC enkawl ṭan­in Lalchhuanawma leh H. Van­lalthlanga te a pui a, season thum a awm hnuin MPL club tho Bethelehem Vengthlang FC chu season khat enkawlin 2015 MFA Super Cup-ah a champion pui. Hemi zawh season-ah a bul ṭanna Chanmari FC-ah let lehin MPL nomawi a chawi pui a, Mizoram team enkawlin Captain NM Gupta Football-ah a champion pui bakah Santosh Trophy-ah semifinal a thlen pui bawk.

Chhinga Veng hi MPL6-a champion rinkai ni pha turin boruak an nei chho mek a, an club official facebook page lam­ah chuan an striker neih ṭhat pahnih MS Dawngliana leh Lalkhawpuimawia bakah Mizo­ram defender R. Laldinliana te an chelh thu an tichiang tawh.