Portugal leh Ronaldo an chelh Cameroon lakah Chile chak

FIFA Confederations Cup-ah Cristiano Ronaldo hoin European champion Portugal thawk chhuak mah se Mexico nen 2-2 in an inhnehtawk a, Pathianni zan inkhel hnuhnung zawkah Chile-in Arturo Vidal leh Eduardo Vargas te goal hmangin Cameroon 2-0 in an hneh thung.

Inkhel hmuhnawm

Kazan Arena-ah Portugal leh Mexico ten inkhel hmuhnawm an lantir a, inkhel a nung ṭha hle. Minute 20-naah man of the match a thlan zui Ronaldo ball petin crossbar a per hnuin Pepe-a'n Portugal hmahruaina goal ni turin a khung a, amaherawhchu video assistant referee (VAR) zarah Mexico an him.

Portugal an chungnung hret a, Mexico keeper Guillermo Ochoa che ṭha mah se Ronaldo ball pek fing tak nang fuhtu Ricardo Quaresma erawh dan theih a ni tawh lo - minute 34-naah 1-0 a ni.

Portugal tan Quaresma-a'n chance ṭha dang a hlah a, Mexico striker Javier Hernandez-a'n goal hmaah a hriam zia a lantir thung. Minute 42-naa Carlos Vela siam chu Manchester United forward hlui Chicharito hian chiang zetin a tauh lut.

Second half-ah team pahnih an innawr tawn zak zak a, Cedric Soares-a'n minute li chiah a awm tawh tihin Potugal tan a pet goal. Amaherawhchu Mexico lam an beidawng lo a, minute 91-naah Jonathan dos Santos corner pet chu Hector Moreno-a'n a tauh goal a, 2-2 in an inhnehtawk.

Mexico coach Juan Carlos Osorio chuan, "European champion kan el pha a, chance pawh kan insiam a, kan khung thei lo a ni. Cristiano Ronaldo goal khung tur kan dang thei a, ball possession pawh 60% dawn kan chan theih avangin kan khelh danah ka lawm a ni," tiin a sawi.

Portugal coach Fernando Santos chuan, "Hun tawpah goal chhuah mah ila, result awm tak a ni. Mexico khan an khel ṭha a ni," tiin point thum hmuh an phu bik loh thu a sawi.

Group A-ah Russia-in an match hmasa berah New Zealand 2-0 in an hneh a, Portugal leh Mexico te an inhnehtawk leh bawk avangin inelna thlengtu ram hi group hmahruaitu an ni.

A tawpah Chile

Chile-in Cameroon 2-0 in an hneh a, amah­erawhchu Copa America champion goal hmahruai hi minute 81-naa lut chauh a ni.

Arsenal-a dinhmun chiang lo Alexis Sanchez chu inkhel thlak danglamtu a ni a, Gunners forward cross hi minute 81-naah Bayern Munich midfielder Vidal-a'n a tauh lut. Injury time-ah Sanchez hian keeper a bum vek hnuah Cameroon defender-in a goal khung tur an dan sak a, Eduardo Vargas-a'n chak nemnghehna goal a khung ta tho.

Sanchez hian goal khung ta se chuan Chile tana goal khung tam ber record a siam dawn a, tunah hian goal 37 khung tawhin Lazio leh Juventus striker hlui Mar­celo Salas nen an khung zat a inang mek.

Sawi hlawh VAR

Portugal-in Pepe hmanga an goal khung VAR hmangin pawm sak a ni lo. Chile tana first half-a Eduardo Vargas goal khung chu VAR hmang thoin pawm a ni lo a, hun tawp dawna Vargas goal khung erawh VAR hmangin pawm a ni lo.

FIFA-in Confederations Cup hi VAR enchhin nan an hmang a, tun dinhmunah chuan buaina zawng zawng a la chingfel tawk lo. Thutlukna siam turin second 30 bawr vel a mamawh a, inkhel boruak a ti dai hman hial.

Portugal coach Santos chuan, "Offside min pawm sak loh kha hriat­thiam a har a ni. Pepe-a'n goal a khung hma khan Cristiano-a'n crossbar a pet per a, hriatthiam a har hle," tiin VAR thutluknaah a lawm lo.

Mexico keeper Ochoa erawhin tunah duthusamin thawk nghal lo mah se nakin zelah VAR chu a la felfai chhoh zel a rin thu a sawi thung.

Results, Fixtures, Team Dinhmun
Group A
June 17, Inrinni
Russia 2 - 0 New Zealand
RUS : Michael Boxall 31'; Fedor Smolov 69'
June 18, Pathianni
Portugal 2 - 2 Mexico
POR : Ricardo Quaresma 34'; Cedric Soares 86'
MEX : Javier Hernandez 42'; Hector Moreno 90+1'
June 21, Nilaini
Russia 8:30 PM Portugal
Mexico 11:30 PM New Zealand
June 24, Inrinni
Mexico 8:30 PM Russia
New Zealand 8:30 PM Portugal
# Team Pld W D L GF GA GD Pts
1 Russia 1 1 0 0 2 0 2 3
2 Mexico 1 0 1 0 2 2 0 1
3 Portugal 1 0 1 0 2 2 0 1
4 New Zealand 1 0 0 1 0 2 -2 0
Group B
June 18, Pathianni
Cameroon 0 - 2 Chile
CHI : Arturo Vidal 81'; Eduardo Vargas 90+1'
June 19, Thawhṭanni
Australia 8:30 PM Germany
June 22, Ningani
Cameroon 8:30 PM Australia
Germany 11:30 PM Chile
June 25, Pathianni
Germany 8:30 PM Cameroon
Chile 8:30 PM Australia
# Team Pld W D L GF GA GD Pts
1 Chile 1 1 0 0 2 0 2 3
2 Australia 0 0 0 0 0 0 0 0
3 Germany 0 0 0 0 0 0 0 0
4 Cameroon 1 0 0 1 0 2 -2 0
Tute nge khel?
Group A
Russia Inelna thlengtu
New Zealand 2016 OFC Nations Cup champion
Portugal Euro 2016 champion
Mexico 2015 CONCACAF Cup champion
Group B
Cameroon 2017 Africa Cup of Nations champion
Chile 2015 Copa America champion
Australia 2015 Asian Cup champion
Germany 2014 World Cup champion