Champions Trophy India hnehtu Pakistan an champion

"A zawna champion India kan lawmpui e" tih chu ICC Champions Trophy final-a India leh Pakistan an inhmachhawn dawn tih a chian ruala social media hrang hranga fiamthu a ni a, a hun a thlen meuh erawh chuan India a zawr. Pathianni zan khan Pakistan hian run 180-in India an sawp a, Champions Trophy nomawi an chawi ta. Khawvel hmun hrang hranga inkhel entu mi maktaduai 366 hmaah India an mualpho.

Pakistan tan Fakhar Zaman chuan century siama bul a ṭan avangin Shaheens-in inkhel bul an ṭan ṭha takzet. India-in an wicket hmasa ber la turin over 22.6 an nghah thlen a ngai a, Pakistan-in an wicket hloh hmasak bera run an siam zat chu 128 a tling der tawh - India bat ve hma hauhin champion tur rinlawk a harsa lo.

Pakistan = Sakei

Kum 1992 khan Pakistan chu tla thei dinhmun aṭanga harhchhuakin World Cup nomawi an chawi a, hetihlaia Shaheens captain Imran Khan chuan, "Sakei hual beh tawh ang maiin bei let rawh u," tiin a naute a fuih a, a chhanna chu nomawi a ni - sakei hual beh tawhin hlauh tur nei loin a bei let ṭhin a, chutianga bei tur chuan Imran hian a naute a fuih.

ICC Champions Trophy 2017 a ni a, ODI ranking-a pariat­na chin chunglam inel­naah hian Pakistan hi top 8 dinhmun luah chungin an inlan - an match hmasa berah India laka mualphoin bul an ṭan a, mah se sakei hual beh ni tawh chu an tho leh ta! Pakistan hian India an hneh loh hnuah Sri Lanka leh South Africa a zawnin an hneh a, champion tura rinkai England semifinal-ah an hnawt chhuak a, India hnehin ICC inelnaa an nomawi pahnihna an chawi ta.

Zaman-a'n za chuang!

Coin toss-ah India an chak a, vawm hmasak an thlangtu Virat Kohli a tisual. The Oval-a inkhelah Pakistan tana bul

ṭantu Fakhar Zaman chuan run 114 zet siamin Indian player-te a tlan kualtir a, a dinpui Azhar Ali (59 runs) chuan a pui

ṭha hle bawk. Over 33.1-naa Zaman vawm out a nih hnu lawkah Shoaib Malik (12 runs) vawm out ni ve leh bawk mah se Pakistan tan run 57 siama a tawp thleng dam Mohammad Hafeez leh Babar Azam (46 runs)-te an chet ṭhat avangin Shaheens dinhmun a ṭha takzet.

Indian bowler-te an che chhe takzet a, Pakistan-in over 50-ah run 338 siamin wicket li chiah an hloh - Pakistan run siam zinga 25 zet hi chu extra a ni. Indian bowler-ten final boruak sangah Shaheens hi run 3 (no ball), 13 (wide) 9 (leg bye)-te an 'khilai'.

India an zawr

Pakistan-in India tan run 339 zet target tuk mah se khaw­vel batting line up-ah heti zat run um turin India aia duhthlan tur an tam chuang lo. Mahse, Indian batsman ten a hun takah an theihna an pholang thei lo - over 16.6 an khelh thlen meuh chuan run 72 chiah an la siam a, wicket ruk hlohin chak tur a chiang tawhah ngaih a ni.

India tan opener Rohit Shar­ma chu run pawh siam loin a out a, a hnung zuitu Shikhar Dhawan (21 runs), Virat Kohli (5),Yuvraj Singh (22), MS Dhoni (4) leh Kedar Jadhav (9) te pawh an ropui lo tlang hle. Men in Blue tan ball 43 a hmachhawna run 76 siamtu Hardik Pandya che ṭha viau mah se over 26.3-a vawm out a nih hnuah India tana ding chhuak tur an awm tawh lo - over 30.3-ah run 158 chiah siamin an out vek a, India an mualpho.

Amir a tho

August 20, 2010-ah khan spot-fixing vangin Pakistani bowler beiseiawm Mohammad Amir chu kum nga chhung inkhel thei lo tura hrem a ni a, kum 2017 a her chhuah leh meuh chuan hrem a nihna khawpuiah Amir-a'n a theihna pholangin Champions Trophy nomawi a chawi ta - kum 25-a upa bowler hian India lakah over ruk vawmin run 16 chiah a pe a, wicket thum a la.

Pakistan tan man of the tour­nament dinhmun luahtu Hasan Ali chuan over 6.3-a vawmah run 19 chiah pein wicket thum a la ve bawk a, kum 23 leka upa bowler hian inelna neih a nih chhungin wicket 13 ngawt a la hman - Pakistan champion-na kawngah a thawh hlawk hle.

Eng nge an sawi?

Pakistan captain Sarfraz Ahmed chuan, "Kan match hmasa bera India kan hneh loh hnuah khan ka naute hnena ka sawi chu inelna a la zawh loh thu a ni. Fakhar khan champion batsman ni awm renga ṭhain ball a hmachhawn a, Amir khan a vawm ṭha takzet bawk. Kan champion-na kawngah ka naute hian fak an phu hliah hliah a ni," a ti.

India captain Virat Kohli chuan, "Pakistan khan an khel ṭha takzet a, ka lawmpui a ni. Chak phu zawkin hnehna an chang a, tun hnaia beisei an phak loh hnuah champion nomawi an chawi thei hi ka lawmpui a, team dinthar leh nan tuna an chak hi an mamawh chu a ni," tiin champion team a lawmpui thu a sawi.