India-in Pakistan an sawp
Pathianni zan khan Hockey World League semifinal khelh mekah India chuan a ṭhenawm leh hmelma Pakistan chu 7-1 a sawpin Pool B hmahruaitu an ni.
Lee Valley Hockey and Tennis Centre-a inkhelah India tan Harmanpreet Singh (13', 33'), Talwinder Singh (21', 24'), Akashdeep Singh (47', 59') leh Pradeep Mor (49') ten goal an khung a, minute 57-naa Muhammad Umar Bhutta-a goal khungin Pakistan mualpho tur a thup zo lo.
Hockey World League semifinal-ah hian a thiam pali chauh an awm tawh tihna ni loin Hockey World League semifinal hi inelna hming anga ngaih theih a ni. Tuna inelnaah FIH World Ranking-a a sang ram 10 an inlan a, group pahnihah ṭhen hran niin an inkhel kual vek ang. India hian match thum an khelh tawhah hnehna chang vekin hmahruaitu an ni a, zanin dar 6:30 hian an hnuai chiaha awm Netherlands nen an inhmachhawn leh ang.
Kum 2016-17 Hockey World League hi a vawi thumna leh a hnuhnung ber tur a ni a, khawpui hrang hrang 14-a khelh kual tur niin nikum April thla khan Singapore-ah khelh ṭan a ni, a tirah chuan ram 64 zet an inlan, an inthlifim chho zel. League hi kumin December thla hian Bhubaneswar, India-ah final khelh tur a ni ang.
Hockey World League Semifinal-a che ṭha te hi nakkum November leh December chhunga neih tur 2018 Men's Hockey World Cup atan an tling nghal bawk dawn a ni.
International Hockey Federation chuan World Cup-ah hian ram 16 an inlan tur thu a sawi chiang tawh, khawmualpui panga champion ṭheuh bakah a thlengtu India chu tling chiang sa an ni. Heng ram paruk bakah hian ranking-a a sang 10 te tan hmun a awm bawk.