Konta hnehtu Donna-i a champion

British miten kum 36 chhung zet chu Nottingham Open-ah khawtual player-in nomawi an chawi lai an hmu ta lo. Pathianni zan khan Johanna Konta-i'n he history hi ziah danglamna hun ṭha nei mah se a hlawhtling thei bik lo - Donna Vekic lakah Konta hi 2-6, 7-6 (7-3), 7-5 in a tlawm.

Khaw lum tak hnuaia inkhelah kum 20 mi Donna-i'n set hmasa ber hloh mah se huaisen takin a bei let a, Britain number 1 lakah set hnuhnung pahnih a sual chhuak. World number 70 hian tennis a khelh hun chhungin WTA singles title pahnih a lakna chiah a ni.

Donna chuan, "Grass court-a ka champion hmasak ber a ni a, a hlu hle. Konta hian kum ṭha tak a hmang mek a, chu tih rualin ka thil tumah ka chiang a, chumi tihlawhtling tur chuan huaisen takin ka kal a ni," tiin a sawi.

Kum 26-a upa Konta tan a chak loh hi a pawi thei, grass court inelna lian ber Wimbledon a hnai a, second round a la pelh ngai lohna hmunah hian inrintawkna a neih tlem phah hial mai thei. Konta hian 2016 Australian Open-ah khan semifinal a lut a, Grand Slam inelna bika a thlen san ber ṭum a ni.