Chinese transfer bazar a inhawng Rooney, Costa, Ronaldo hming an lam ri

Nimin khan Chinese Super League transfer bazar a in­hawng a, khawvela footballer langsar tak tak hming lam rik a ni nghal. CSL hian nikum khan khawvel huap pawha player langsar ni phak Oscar, Hulk leh Carlos Tevez te hial an lalut a, transfer bazar-a an sum sen zat belhkhawm pawh pound maktaduai 350 chuang a ni.

Europe-a player hmabak eng tak tak neite pawhin sum a tam miau avangin China lam an hawi ṭhup a, European club-ten hlawh an pek let zel pek an huam miau avangin sum tamna hmun hian an chil a ti put lo thei lo - nipui transfer-ah player langsar tak takin China an pan a nih pawhin a mak lo ang.

Mahse...

Chinese club ten uchuak taka sum an sen nasat avangin January khan China sorkar hnuaia General Administration of Sports chuan club-te chu awmze nei zawka sum seng turin a lo hriattir tawh a, Chinese Football Association chuan ram pawn player laka club-te sum sen tam lutuk tih ziaawm nan dan thar a siam bawk.

Tun season kal meka dan thar an hman ang chuan CSL club ten match tina player 18 an hruai zingah Chinese player kum 23 hnuai lam pahnih tal an awm tur a ni tih a ni a, pakhat hi starting XI-ah an awm ngei ngei tur a ni, tih a ni bawk. Match khatah foreign player pathum aia tam inlan a thiang lo bawk.

Dan thar

Chinese FA-in tun hnaiah dan khirh zawk an siam leh tawh a, thla hmasa khan club tin chu ram pawn player pakhat an khelhtirah Chinese U23 player pakhat zel khelhtir turin thu an pe. Hei mai hi a ni lo, CSL club ten ram pawn player manto uchuak taka an lei ṭhin tih reh nan foreign player an lei pound maktaduai nga man chunglam chinah chhiah 100% zel an chawi tawh ang tih a ni riap mai, heta sum an thehluh hi Chinese naupang ten hma an sawn theihna tur atan hman a ni ang.

Entirnan Chinese club-in Cristiano Ronaldo lei ta se, Portuguese forward man zat hi pound maktaduai 200 lo ni ta se amah leitu club hian pound maktaduai 200 dang chu an chawi a ngai dawn tihna a ni. Hei hian Chinese club-te transfer bazar-ah a ti tim deuh tura ngaih a ni a, hetihruala hei hian a kawh tel chu Chinese club ten foreign player rau rau ah free transfer-a lakluh theih player an melh hnem ang, tih hi a ni.

Rooney a langsar

CSL transfer bazar-a in­hawng a, hming langsar ber chu Wayne Rooney a ni nghal. Chinese club-ten foreign player lakluh nan chhiah 100% chawi dawn mah se Manchester United captain hian Old Tarfford-ah kum khat bak contract a neih tawh loh avangin pound maktaduai nga aia tlawm pawhah a kal theih rin a ni a, heti zat leka lakluh a nih chuan amah laluttu ten chhiah an chawi a ngai dawn lo. English striker hi hun rei tak chhung CSL nen sawizawm an lo ni tawh bawk nen season tharah China lamah kan hmu a nih pawhin a mak lo ang.

English player zinga hming langsar dang leh chu John Terry a ni. Chelsea legend hi club nei loa a awm mek avangin a man zata maktaduai tel pawisa insen a ṭul dawn lo a, Stamford Bridge-ah contract thar a ziah dawn loh thu a chian aṭanga CSL club-te chil ti puttu defender hi Chinese club hausa ten hlawh hnem tir an inhuam khawp ang - tun dinhmunah Championship club Birmingham City chuan kar khata pound nuai khat bawr vel hlawh turin an sawm ve mek bawk.

Costa an lam ri

Antonio Conte-a'n Diego Costa hnenah a mamawh tawh loh thu text message hmangin a hrilh a, Spain international striker hian khawvel hriatah he thu hi a puang chhuak. Brazil a piang striker hi khawthlang media ten a kalna tur an inrinsiak mek a, January transfer-a Chinese Super League club Tianjin Quanjian nena sawizawm hlawh tak striker hi CSL nen an sawi zawm leh mek tawh.

Borussia Dortmund striker chhuanvawr Pierre-Emerick Aubameyang chu CSL club nen sawizawm mek an ni bawk a, Gabonese striker hian Liverpool nen indawrna thui tak a kalpui tawh nia sawi a awm bawk. Season hman zawh taka match 46 a inlana goal 40 khung thei striker hi Tianjin chuan khawvela footballer hlawh hnem ber ni tura kar khata £824,000 hlawhtir an inhuam niin an sawi a, hming-ṭhatna aia sum a dah sang zawk a nih chuan China a pan ngei ang.

China lawmna Nasri?

Manchester City boss Pep Guardiola ruahmannaah Samir Nasri a tel phak lo a, season hman zawh takah khan Sevilla tan loan-in a khel. Nasri-a loan hun a tawp a, Sevilla tan chhawr chhunzawm zel turin a hlawh leh man a tam hret a, City-in an mamawh lo bawk. Hetiang boruak karah hian France tana vawi 41 inlan tawh midfielder hi Sunderland boss hlui Gus Poyet enkawl Shanghai Shenua nen sawizawm mek a ni a, a man zat hi pound maktaduai 12 bawr vel ni tura ngaih a ni bawk.

Tun hnaia Real Madrid chhuahsan a duh thu sawitu Cristiano Ronaldo chu China nen sawizawm an ni bawk a, mah se Real Madrid forward hi chu a hlawh piah lamah Spanish club hian pound maktaduai 130 aia tlawma an hralh a rinawm loh avangin chhiah 100% an chawi tur nen Chinese club zingah lalut ngam an awm a rinawm loh a, Portugal captain hian Europe chhuahsan a duh lo nia sawi a awm bawk - CSL tan beisei chi a ni lo.