AC Milan demtu Mino Raiola
Goalkeeper ṭhangduang Gianluigi Donnarumma-a agent Mino Raiola chuan a player laka AC Milan chet dan chu mak a tih thu leh a dem thu a sawi chhuak.
Italy international Donnarumma hian season khat bak Milan tan contract a nei tawh lo a, tun hnaiah contract a pawh sei loh tur thu a chian tak avangin Real Madrid, Juventus leh Manchester United te nen sawi zawm nghal a ni.
Raiola chuan, "Donnarumma chunga a club chetdan hi a mak hle, diriam leh vau a tawk mek. A mimal leh chhungkua chu an nunna a hlauhthawn awm ang hial leh season khat chhung inkhel miah lo a awm tur ang hial te in vau a tawk a ni," tiin a sawi.
Football khawvela agent lar tak Raiola chuan sawi chhunzawmin, "Gigio hian nakin huna a tana ṭha ber tur a ngaihtuah a, contract thar ziah pawh a hreh lo. Mahse, club lam hian boruak ṭha lo leh duhawm lo tak an siamsak avangin buaina a awm zawk a ni," a ti.
La Liga leh Champions League nomawi kawl kawptu Real Madrid chu Donnarumma lalut tura sawi rik rin an ni a, hetihlai hian Italian champion Juventus pawhin nakina Gianluigi Buffon thlak turin an duh hle nia sawi a ni bawk.
Hetihlai hian AC Milan CEO Marco Fassone chuan an player chuan a thutlukna suta a club tan hun rei zawk khelh a duh a nih chuan a tan kawng a inhawn reng thu a sawi ve bawk.