Srikanth-a'n nomawi dang a beisei

Indian tlangval zinga Grand Prix Gold, Super Series leh Super Series Premier title la kim thei hmasa ber Kidambi Srikanth chuan hliam a nei lo a nih chuan nomawi dang a vuak chhuah zel theih a beisei thu a sawi.

Kum 24 mi Srikanth chuan, "Player kan nih chuan chawl hman kan ni lo, tunah hian tunkara khelh tur Australia Open tan ka inbuatsaih leh nghal a ngai. A tam thei ang ber inkhelh ka duh a, a bik takin August thlaa neih tur World Championship-a inrintawkna ka neih theih nan result ṭha neih zel ka mamawh," a ti.

Pathianni tlaia Singapore Open nomawi chawitu chuan sawi chhun­zawmin, "Hliam vanga ka inkhelh theih loh hian hrehawm ka ti ṭhin hle, tun hnaiah erawh harsatna nei loin ka inkhel thei ta. Ka dam a nih phawt chuan nomawi dang hlawh chhuah leh theih ngei ka inbeisei," tiin a sawi.

Feet 5 leh inches 10-a sang Srikanth hi doubles player ṭha tak a ni tel ṭhin a, mah se a theihna hrechiangtu Pullela Gopichand-a'n singles player atan thlakin a ti sual lo chiang hle.

Hyderabad tlangval hian kum 2015 khan India Open Super Series leh Swiss Open Grand Prix nomawi a chawi a, nikum khan Syed Modi Grand Prix Gold-ah a hlawhtling bawk. A vawi khat nan Rio Olympic-ah khan inlan ve mah se quarterfinal-ah Chinese legend Li Dan a ngam lo, hliam a neih bawk avangin a chawl zui reng a, tunah erawh hliam nei loin a khel thei ve leh tawh a ni.

Australia Open-ah hian Sri­kanth bakah hmeichhe inelna lamah world number 1 hlui Saina Nehwal leh PV Sindhu te chu player langsar an ni dawn a, Ajay Jayaram, Sameer Verma leh H S Prannoy te an inlan bawk ang.