FPAI XI hmachhawn tur Mizoram XI Chhiatna tawkte hnenah pawisa hmuh hlan dawn
India rama footballer intel khawm pawl, Football Players' Association of India (FPAI) leh Mizoram Football Association ṭangkawp chuan July 1, 2017 khian Rajiv Gandhi Stadium-ah exhibition match an buatsaih dawn a; he inkhela sum tling khawm aṭang hian tun hnaia Mizorama chhiat tawkte ṭanpuina atan sum an pe dawn a ni.
MFA chuan nimin khan FPAI XI hmachhawn tur player 20 awmna Mizoram XI a puang a, India striker Jeje Lalpekhlua, Mizo legend S. Malsawmtluanga leh I League-a Aizawl FC champion theihna goal khungtu William Lalnunfela te chu telh an ni.
Ṭanpui ngaite ṭanpuitu
FPAI President hmasa ber Bhaichung Bhutia chuan, "Tun hnaiah Mizoramin chhiat a tawh thu kan hria a, FPAI angin sum nei tam lo mah ila theihtawpa puih ve kan duh a ni. Hei vang hian kum danga zan lama award kan sem
ṭhin pawh kan buatsaih lo mai ang a, khelmualah FPAI Awards pawh kan sem vek mai ang. Sum kan hmuh chhuah angte hi chhiat tawkte ṭanpuina atan Mizoram chief minister kutah hlan kan duh a ni," tiin ṭanpui ngaite tana an luanchhuah tur thu a sawi.
India captain hlui Bhaichung chuan, "Tun hnaia football lama Mizoram hmasawn zia kan hria a, hei vang hian Mizoramah ngei FPAI hun pawimawh hi hman kan duh a ni," tiin Mizoram an thlan chhan a sawi bawk.
MFA honorary secretary Lalghinglova Hmar chuan, "Tun ṭuma inkhel hi FPAI leh MFA ṭangkawpin kan buatsaih tur ni mah se, FPAI pual inkhel bik a ni. Anni hian an kal leh thlenna sensote paih hnua a hlawkna dang awm ang ang chu Mizorama chhiat tawkte ṭanpuina turin pek an duh a, hei hi MFA chuan ṭha a ti takzet a ni. India rama footballer ṭha rual an rawn pungkhawm tur leh, Mizo player ṭha thlan khawmte nen an inkhel thei tur hi kan lawm takzet a ni," a ti.
Mizoram XI chu
Mizoram XI-ah India rama player langsar tak takte bakah tualchhung player ṭha an inpawlh. Santosh Trophy 2017-a Mizoram team aṭangin player paruk an tel a, a dang zawng chu I League leh Indian Super League team hrang hranga khel Mizo player-te an ni.
Tel thei lo pariat!
Hetihlai hian Mizo player ṭha pariat ngawt mai chu India Under 23 team-ah koh an nih avangin Mizoram XI-ah an tel ve lo. Chung player-te chu Isaac Vanmalsawma, Jerry Lalrinzuala, Lalramchullova, Lalruatthara, Lallianzuala Chhangte, Jerry Mawihmingthanga, Sairuatkima leh Daniel Lalhlimpuia te an ni.
En man
FPAI leh Mizoram XI inkhel hi July 1, 2017 chawhnu dar 2:30-ah Rajiv Gandhi Stadium-ah khelh tur a ni a, inkhel en man hi Rs 100 leh Rs 200 a ni ang a; stadium chung lam hi Rs 200/- man a ni dawn a, a hnuai lam hi Rs 100/- man a ni thung ang.
Mizoram XI
Goalkeepers:
1 Lalthuammawia Bengaluru FC
2 Lalmuanawma Chanmari FC
Defenders
3 Zohmingliana Ralte Aizawl FC
4 Robert Lalthlamuana East Bengal
5 Sena Ralte Bengaluru FC
6 Lalrinchhana Tochhawng Chanmari FC
7 Lalrinzuala Khiangte Aizawl FC
8 Lalchhuanmawia ONGC, Mumbai
9 Lalhmunmawia Mizoram Police FC
Midfielders
10 S. Malsawmtluanga Southern Samity
11 Lalrindika Ralte East Bengal
12 R. Laldanmawia Aizawl FC
13 Malsawmzuala Bengaluru FC
14 Lalrinchhana Chanmari FC
15 Lalfakzuala Mizoram Police FC
16 Brandon VL Remdika Aizawl FC
Forwards
17 Jeje Lalpekhlua Mohun Bagan
18 Samuel Lalmuanpuia Shillong Lajong
19 F. Lalrinpuia Mizoram Police FC
20 William Lalnunfela Aizawl FC
* Player-te khelhna club hi an khelhna hnuhnung bera an inziah luhna anga dah a ni.
Coaching Staff
Manager R. Lalramzauva
Asst Manager RK Rozidinga
Coach Danny Lalduhawma
Asst Coach Samson Ramengmawia
Physio Abhisag Vantluangpuii