June 30 aṭangin Mizoram Fight League
Mizoram Fight League (MFL) chu June 30 aṭangin ṭan a ni dawn a, inelna hi Mizoram State Mixed Martial Arts Association (MISMA) leh Zonet te buatsaih a ni.
Nikum khan MISMA leh JSJ Fit Pro ten JSJ Fight League an buatsaih tawh a, he inelna hi Mizoten Fight League an hmel hriat ṭanna a ni. MFL-ah JSJ Fight League kalphung her danglam hret a ni tawh ang a, mimal inelna a awm rualin team inelna a ni tel tawh ang.
MFL hmasa berah hian team pali Juggernaut MMA, Promise Strivers, DSZ Fight Club leh BCA Brawlers te chu an inel dawn a, thla khat danah event a awm ang a, December thlaa zawh tur a ni.
Fight League atan hian MISMA chu nasa takin a inbuatsaih tawh a, fighter-te skills & fitness test an neih bakah training an neihpui chho zel a, official turte pawhin training an nei tawh. June 28-29 hian skills & fitness test-a tlingte tan contender fight buatsaih a ni dawn bawk.
MFL hi Zonet chuan a pechhuak dawn a, NetSurf Internet Service Provider chuan internet lama hmuh theih turin a 'livestream' dawn bawk a ni. MISMA chuan India ram chhung leh pawn thlenga MMA fight-a Mizo fighter-te an inlan theih nan kawng a sial ang.