Chanmari-in final an lut tawh? Tlai dar 3:30-ah Chhinga Veng Vs Ramhlun South

TṬ Royte Trophy - Inter Branch YMA Football Tournament final-a inhmachhawn tur vawiin hian a hriat dawn a, Lammualah Chanmari, College Veng, Chhinga Veng leh Ramhlun South mipui bakah tualchhung football ngainatute an pungkhawm ang.

Chanmariin semifinal first leg-ah College Veng 2-0 in an hneh a, tlai dar 1:00 hian veteran coach H. Vanlalthlanga hoten tlarhnung rem phui thiam coach Chawngthansanga hote lehthal an tum dawn.

Tlai dar 3:30-ah Chhinga Veng leh Ramhlun South an inkhel dawn a, final lut turin beisei an nei ve ve.

Beiseina nen

Kum 2003 khan College Veng chuan CYMA Football-ah a vawi khat nan final an lut a, an banner thawhchhuah pui pawh 'Thlanga for Governor' tih a ni. Kum 14 liam hnuah College Veng hian coach Thlanga hoin semifinal an lut leh a, nomawi chawi inbeisei mah se first leg-ah Chanmariin an hneh a, penalty shootout thleng pha tur pawhin goal hnih tala an chak a ngai tawh ang.

College Veng manager F. Lal­hmu­chianga chuan, "First leg-a kan khel kha tun inelnaa kan chet chhiat ber ṭum a ni a, kan result pawh lungawi thlak loh mah se hnual nan kan hmang lo. Goal hniha kan chak loh avang khan chak châkna kan neih belh sawt a, veng mipui pawh an la phur hle a ni," tiin beiseina an la neih thu a sawi.

College Veng hian inhliam vanga first leg khel thei lo Ramfang­zaua an chhawr thei tawh dawn a, Edenthara'n hremna a hman zawh tawh bawk avangin first leg aiin an

ṭha tawh zawk dawn. Chianga chuan sawi chhunzawmin, "Training-naah pawh kan phur a, second leg khel tur hian kan inpeih tawh a ni," tiin Vanglaini a hrilh.

Chanmari lamin first leg khel thei lo Aizawl FC defender Lal­hriat­renga (Achi-a) an hmang thei dawn a, tlarhnung phui tawh sa a phui sawt ang. Coach Chawnga'n Reitlang FC leh Chanmari West FC a enkawl lai tawh aṭangin defensive game khelh a thiam tih a pho lang tawh ṭhin a, final lut turin goal venhim a tawk.

Chanmari coach Chawngthan­sanga chuan, "Final kan la lut lo. Minute 90 khelh tur a la awm a, eng pawh la thleng thei a ni. Keni chuan kan hmachhuan chu team game a ni a, kan vaia kan thawhho ṭhat a pawimawh a ni. Jerry awm tawh loh hnuah pawh goal khung kan la bansan lo a, College Veng lakah pawh kan theihna zawng zawnga kan khelh leh a ṭul dawn a ni," tiin a ṭawng fimkhur hle.

A hmuhnawm dawn

NECS Cup champion lai Chhinga Veng leh semifinal lut zinga CYMA Football-a champion tawh awmchhun Ramhlun South inkhel tur hi a hmuhnawm dawn. First leg-ah chak zawk an awm lo a, minute 90 khelh leh tura chak zawk hian final an lut ang.

Ramhlun South coach HC Zarzo­liana chuan, "Final lut tur a hriat tawh dawn a, hei vang hian rawng huai kan ser tawh ang," tiin Vanglaini a hrilh.

First leg-ah DSK Shivajians forward Lalawmpuia, Chennai City forward Lalnunmawia leh Mizoram junior team forward R. Lalthanmawia ten bul an ṭanlo a, second leg-ah chuan tu emaw ber hi chu kan hmuh tawh ngei a rinawm.

CYMA Football 2008 champion Ramhlun South hian hrem vangin Lalmawizuala an chhawr thei dawn lo a, coach Zara'n an tawrh phah a ring lo. MPL-a Chanmari West FC coach Zara chuan, "Duh thlan tur player kan nei a, a vannei zawk an chak ang. Team ṭha zawk an vannei ṭhin tih hriat tel a ṭha," tiin Vanglaini a hrilh.

Chhinga Vengin first leg-a an chhawr theih loh midfielder Lalchhuanpuia an chhawr thei tawh dawn a, an inringtawk sawt dawn. Coach Jonathan Lalbiakkima chuan, "Kan chak ngei ka ring. Kan fitness a ṭha zawk a, hei hi kan chakna chhan tur pakhat a ni. Khaw awm dan hi chu chhuanlam atan hman kan tum lo a, amaherawhchu kan duh dan anga khel thei tur chuan khua ṭha se kan ti," tiin ṭha zawka an inngaih thu a sawi.

Semifinal
1st leg : June 19, Thawhṭanni
Ramhlun South 1 - 1 Chhinga Veng
RAM : Malsawmfela 23'
CHH : Lalnunsanga 86'
College Veng 0 - 2 Chanmari
CHA : Rosangliana 27'; Lalhriatpuia 90+3'
2nd leg : Vawiin Inkhel Tur
01:00 PM Chanmari Vs College Veng
03:30 PM Chhinga Veng Vs Ramhlun South
Final - June 23, Zirtawpni