Ronaldo leh Real president an la in be lo

Real Madrid forward Cris­tiano Ronalo-a'n Real Madrid chhuahsan a duh thu a sawi a, Manchester United, Chelsea leh Paris St-Germain nen sawi­zawm an ni nghal. Mahse, footbal khaw­vel titi tui ber ni mek chung­­changah Real president Floren­tino Perez chuan Ronaldo nen inbiakna an la neih loh thu a sawi.

Kum 32-a upa Ronaldo hi 2011 leh 2014 inkara chhiah pound maktaduai 13 awl ruah puh a ni a, Portugal captain hian puh an nihna hi hrethiam loin Spain chhuahsan a duh. November 2016-a Santiago Bernabeu-a kum nga dang cham tura contract ziaktu forward hi a contract ang chuan amah lei duhtu tan pound maktaduai 874.88 sen a ngai ang, tih a ni a, Ronaldo lam hnaite chuan pound maktaduai 131 vela lei theih a nih an rin thu an sawi thung.

Ronaldo biak tum Perez

Thawhṭannia kum li dang Real Madrid president ni tura thlan tlin Florentino Perez chuan, "Tuna ka sawi theih awmchhun chu Cristiano Ronaldo hi Real Madrid player a ni, tih hi a ni. Tun hnai thil thleng vangin a rilru a buai tih hi phat rual a ni lo a, nakinah engkim min hrilhin inbiakna ṭha tak kan nei thei ang tih hi ka chiang a ni," a ti a, a player chhuanvawr chu chhuahtir a tum lo hle.

Perez chuan sawi chhunzawm­in, "Ronaldo hian tunah inelna pawimawh tak Confederations Cup a hmachhawn mek a, inelna zawh hma hauha he thu hmanga lo va tihbuai hi ka duh lo. Portu­guese team-te ngaihtuahna lo lak pen hi a ṭha lo a ni," tiin tun hnaiah thuthang tam tak a awm chunga Ronaldo nen indawrna an la neih loh chhan a sawi.

Suma buai lo Ronaldo

Ronaldo-a'n a chhuah duh thu a sawi meuh chuan Manchester United fan-ten an mang ramah Por­­tuguese forward an hmu ṭan leh der tawh a, Chelsea leh Paris St-Germain ten an sum neih hmachhuanin Portugal captain an lo mitthla ve mek bawk - Perez thu­­­sawi erawh sum duh vangin Ro­­­nal­do a chhuak lo ang, tih hi a ni.

Perez chuan, "Ronaldo hian a duh ber chu khawvela player ṭha ber nih hi a ni tawp mai. Cristiano hian Real chhuahsan a duh takzet a nih chuan sum vang a ni lo ang," a ti a, Ronaldo beisei vetu nia sawi Chinese Super League lam tan thu hriat nuam a ni lo.

Dawrtu nei lo Ronaldo

Ronaldo-a'n chhuah a duh thu a sawi hnu lawkah khawvela club 'kei ka ni' inti chin nghing dual angin sawi ni mah se an forward chhuanvawr hian dawrtu a la neih loh thu Perez chuan a sawi nghal bawk. Ronaldo bakah hian Real-a hmun chang phak lo striker Alvaro Morata leh midfielder James Rodriguez pawh United nen sawizawm mek an ni bawk a, mahse anni pahnih pawh hian dawrtu an neih loh thu Perez chuan a sawi.

Kum 70-a upa, Spanish sum­dawng hausa Perez chuan, "Kan player-te hi season tharah tumah chhuah tir kan duh lo a, hetia ka sawi hian James Rodriguez pawh ka sawi tel a ni," tiin Ronaldo hma hauha Real chhuahsan tur anga sawi Colombian midfielder chelh an tum thu a sawi lang nghal.

Perez leh Ronaldo

Kum 2009 khan Perez-a'n Real Madrid aṭangin pound maktaduai 80 man Cristiano Ronaldo a lalut a, a hunlai hian khawvela player manto ber a ni - Ronaldo-a'n Real a pan hma hian Manchester United-ah kum ruk hun a hmang a, Premier League nomawi pathum leh Champions League chawipuiin Ballon d'Or a dawng bawk.

Santiago Bernabeu-ah fans 80,000 chuangin Ronaldo an lo lawm a, kum riat a liam leh meuh chuan Spanish club tan hian match 394 khelin goal 406 a khung sak a, La Liga (2), Copa del Rey (2), Spanish Super Cup (1), Champions League (3), UEFA Super Cup (1) leh FIFA Club World Cup (1) a chawipui tawh bawk - player satliah a nih lohzia pholang vektu a ni a, vawiin thlenga amah laluttu Perez hming ṭhat chhan a ni.

Ronaldo tan beer!

Cristiano Ronaldo-a'n chhuah a duh thu a sawi hnuah club lian chauh an nghing lo a, club tenau lam hlei hleiin nuam an lo ti! German third division club Fortuna Koln chuan, "Cristiano, striker kan la zawng mek. Pawisa chu kan nei lo a, mah se i dam chhung atan a thlawnin beer kan pe thei ang che," tiin twitter-ah an ziak - Ronaldo hian zu kaihhnawih hrim hrim a in ngai lo thung.

Real legend Fernando Hier­ro lo khelh tawhna Bolton Wan­derers chuan, "Cristiano Ronaldo hi inbiakna kan neihpui dawn lo," tiin an tarlang mauh a, English eight division club Salisbury FC chu, "Ronaldo nena sawi zawm kan nihna chungchangah sawi tur kan nei lo," tiin an lo fiamthu bawk a!

Hetihlai hian Ronaldo nena sawizawm, Portugal captain lakluhna tur sum pawh nei tawk nia ngaih Bayern Munich chuan Ronaldo lakluh an tum loh thu an tichiang bawk.