German rawlthar an chak

Thawhṭanni zan khan world champion Germany chuan FIFA Confederations Cup-a an match hmasa berah Australia chu 3-2 in an hneh hram a, goal difference nei ṭha zawk Chile hnuaiah awmin Group B-ah pahnihna an ni.

Russia-ah Joachim Low-a'n 2014 World Cup champion squad player langsar keeper Manuel Neuer, Arsenal mid­fielder Mesut Ozil, defender Mats Hummels leh forward Thomas Muller te a hruai lo. Sochi-a inkhelah Brazil-a hlawhtling zinga player pahnih chiahin inkhel bul an ṭan.

Player langsar tel lo pawh­in Low-a nauten ṭan phat aṭang­in Australia an ngam hle, minute ngana lekah midfielder Lars Stindl chuan Premier League club thar Brighton and Hove Albion player manto ber Australia goalkeeper Mathew Ryan paltlangin goal hmahruai a khung nghal.

Kum 2015 Asian Cup cham­pion an zam bik lo, Celtic midfielder Tom Rogic hmangin chawlhlawk hma minute li chauh awm tawhah an sut a, minute 44-naah Germany tan captain Julian Draxler-a'n penalty chhuih lutin an ram hma a hruai nawn pui.

Second half-ah pawh Ger­man player bawk a chefuh hma­­saah an ṭang. Minute thum­na lekah Joshua Kimmich thawh­rah sengin midfielder Leon Go­retzka-a'n an goal thumna khungin an ram chu dinhmun duhawm takah a hlangkai.

Goal thum an chhuah hnuah Australia an beidawng duh bik lo, forward Tomi Juric goal khung chungchangah handball vanga sawi zui awm mah se video assistant referee hman a nih hnuah goal-ah pawm a ni. German keeper rinrawl Neuer a awm loh avanga inlan Bayer Leverkusen keeper Bernd Leno-a'n beisei a phak tawk lo - Low-a'n duh thlan turin bench-ah Barcelona si ban nghak Marc-Andre ter Stegen a la nei thung.

Eng nge an sawi?

Germany coach Low chuan, "A bul kan ṭha ṭhain kan khel hmuhnawm a, hnehna kan chan avangin kan lawm tur a ni. Bernd Leno khan hna a nei tam lo, chutihrualin kan lama goal luh dan erawh inven theih a ni thung," a ti.

Kum 57 mi Low chuan inkhelh hmabak thlir nghalin, "Chile hi khawvela team ṭha berte zinga mi an ni, an khelh dan phung leh rilru put hmang hi a sangin tu tan mah dah hniam theih an ni lo," tiin a sawi.

Germany hian an match hnihna atan Ningani zan dar 11:30-ah Copa America champion Chile an hmachhawn leh ang. Group A hmahruaitu Chile hian an match hmasa berah Cameroon 2-0 in an hneh tawh. Australia leh Africa Cup of Nations champion te hi dar 8:30-ah an intawng ve leh bawk ang.

Australia head coach Ange Postecoglou chuan, "He hmunah hian hnehna chan tumin kan kal a, kan chak loh avangin a pawi ka ti hle. Minute 45 hmasa lam kan khel chhe hle a, goal hnih chiah kan chhuah kha kan vannei zawk. Dinhmun dawhawm lo taka kan awm hnua kan beih let dan erawhin minti lawm hle, a khaikhawm nan chuan keini aiin an ṭha zawk," tiin a sawi.