'Mizo team' India U 19 tan Edmund

Thawhṭanni zan khan Bambolim Stadium, Goa-ah Mizo rawlthar parukin inkhel bul an ṭannaah India Under 19 chuan Singapore Under 19 chu friendly match-ah 7-2 in an sawp a, Mizo an langsar hle - Edmund Lalrindika chuan goal thum a khung bakah B. Lalnuntluanga'n goal khat a thawh ve bawk.

Mikhual team Singapore-in minute sarihna lekah goal hmahruai khung mah se India-in Edmund an nei a, Lunglei rawlthar hian minute 37 chhung leka hattrick siamin a team hi hnehna a chanpui chiang hle - Edmund hian goal thum a khung piahlamah hian a ṭhiante goal khung tur vawi thum ngawt a siamsak bawk a ni.

Chawlhlawk hman a nih hmain India hian goal ruk an khung tling der tawh a, goal rukna hi Lalnuntluanga khung a ni. Lunglei rawlthar pahnihin India U19 tan goal li an thawh a, goal thum dang hi Roshan Singh-a'n a khung ve bawk.

India U19 starting eleven-ah hian Mizo paruk - Lal­lian­sanga, Joseph Lalsanglura, Zonun­mawia, Lalengzama Vangchhia, B. Lalnun­tluanga leh Edmund-te an inlan a ni.