Sawi hlawh Gianluigi Donnarumma

AC Milan goalkeeper Gianluigi Donnarumma hma lam hun tur a chiang lo a, a agent Mino Raiola leh Italian club thuneitute thu a inhmu lo, thiam chang zawk nih tumin an in bei mek.

Kum 18 chauha upa Donnarumma hian Milan tan kum khat daih bak con­tract a nei tawh lo a, kar hmasa khan Raiola chuan a player hian contract thar a ziah loh tur thu a sawi.

Milan chief executive Marco Fassone chuan Rai­ola leh Donnarumma chet dan chu pawisa chawi thei hial an nih thu a sawi a, hetihlai hian Raiola erawhin Milan chu an pla­yer vau betah a puh thung.

Euro Under 21 khelh mekah Donnarumma hi Italy aiawhin a inlan mek a, Pathianni zana Denmark 2-0 a an hneh ṭumin fans ṭhenkhat chuan pawisa lemin an vawm a, sum um vanga chhuah tuma puhin tihelna banner 'Dol­larumma' tih chuanna an tarlang hial!

Manchester United hnena khawvel player manto ber ni tura Juventus midfielder Paul Pogba hralhtu Raiola chuan, "Contract thar i ziak lo a nih chuan season khat chhung bench-ah hun i hmang ang," tiin Donnarumma hi vau a ni, tiin Milan chu na takin a dem.

Raiola chuan sawi chhunzawmin, "Inter Milan nen inbiakna an neih lai kum 14 mi chauh a nih laiin Gigio hian Milan tana khelh a duh zawk tawh, hei vang hian he club hi a khelh duhna hmun a ni. Chutihrualin tuna a chunga an chet dan thlir chuan season khat dang hun hman belh leh hi a tan a him ber kher lo mai thei," a ti.

Kum 16 mi lek a nih laia Milan tana khel phak Donnarumma hian a club tan inelna hrang hrangah match 72 zet a khel tawh a, feet 6 leh inches 5 zeta sang keeper hi Europe club lian dangin an club tan khel turin an awt hle.

Milan chief executive Fassone chuan, "Kan ṭan­­na chu a ngai reng, Don­narumma hi zawrh lai a ni lo a, season tharah Milan tan a khelh chhunzawm ang. A thutlukna sutin contract thar a ziak duh a nih pawhin keini lam chu kan inhawng reng," tiin an player ṭhangduang tak chu chelh an tum thu a sawi ve thung a ni.