Confederations Cup Inelna thlengtu Russia hmaah Europe champion
Zanin dar 8:30-ah Confederations Cup thlengtu Russia leh Europe champion Portugal an inkhel dawn. Russia hi an match hmasa bera New Zealand 2-0 a hnehtu an ni a, Portugal erawh Mexico nena inhnehtawk chunga bul ṭantu an ni - ram pahnih inkhel tur hi a hmuhnawm dawn.
Group A inkhel dangah zan dar 11:30-ah hian Mexico leh New Zealand an inhmachhawn dawn bawk a, CONCACAF champion Mexico hi Portugal laka an khelh dan ngaihtuahin champion sawi ri ngam tur khawpin an ṭha tih a lang - New Zealand laka talbuai tur an niin a lang lo.
Nomawi chawi duh Ronaldo
Portugal-in an match hmasa berah rin loh takin Mexico an inhnehtawkpui a, Cristiano Ronaldo-a'n champion beiseina an la neih thu a sawi. Portugal captain chuan, "He team hian hma kan sawn ve reng a, Confederations Cup nomawi chawi turin kan dinhmun a ṭha takzet a ni. Group stage-ah match hnih khelh tur kan la nei a, kan tih tur chu chi ai loa khelh hi a ni mai," a ti.
Ronaldo chuan sawi chhunzawmin, "Hnehna kan chan ngei a ṭul a, point thum kan hlawh chhuak thei a nih chuan champion kan hnaih sawt dawn tihna a ni," a ti a, Russia ramah inelna thlengtu hneh theih a inbeisei.
Players siksawi tum Santos?
Portugal boss Fernando Santos-a'n inelna ṭan a nih hmain match tinah a naute siksawi a tum thu a sawi a, rin loh taka Mexico an inhnehtawkpui takah chuan a naute a siksawi kher ang em? tih chu zawhna awm thei tak a ni - match tawp berah New Zealand an hmachhawn dawn a, hei hi rilrua dah chungin zaninah an ṭhat dan bera Russia an hmachhawn a nih pawhin a mak lo ang.
Hetihrual hian Russia hi awlsam taka hneh theih an ni dawn lo. Mahni khelmuala inlan tur an nih piahlamah a ram pumin an ṭang ho a, New Zealand nena an match hmasa ber pawh kha Russia president Vladimir Putin chuan a hmunah a en - an ram player te an match hmasa ber aia ṭha zawka an khelh zel a beisei thu a sawi. An ram president thusawi hi Stanislav Cherchesov leh a nauten um zui an tum dawn.
Mexico tan Chicharito
Confederations Cup-a an match hmasa berah Mexico chak zo lo mah se Javier Hernandez hoa khel tur team hi New Zealand hmaa zam tur an ni lo. Manchester United striker hlui hian Portugal lakah goal a khung tawh a, ram tana goal 50 khung tling turin goal hnih chiah a mamawh tawh - ram tana goal khung hnem ber a nihna chhawm nung zel turin New Zealand lakah goal khung leh ngei a tum ang.
Portugal laka bench-a a
ṭhut tluan hnuin Mexico captain Rafael Marquez chu zaninah inlan tura beisei a ni a, Barcelona defender hlui hi a inlan a nih ngat chuan Confederations Cup-a inlan thei upa ber dawttu a ni ang - kum 38 leh thla lia upa a ni tawh!
Kiwis an duai lo
Confederations Cup-ah champion tura rin hlawh lo ber pawl thlang dawn ta se New Zealand-in vote an hmu sang hlein a rinawm - Mexico tan zuam ngawt erawh thil tih chi a ni chuang lo. Ram pahnih hian October 9, 2016-ah khan friendly match an lo khel dun tawh a, El Tri (Mexico sawina) hian 2-1 in hnehna an chang thei hram.
Hetihrual hian New Zealand hian Russia an hneh loh chiah khan Confederations Cup-ah match 10 chhung a zawnin hneh an tawng tawh lo tihna a ni a, minute 513 chhung goal an khung miah lo bawk - mahse, heng record duhawm lo thaibo tur hian Leeds United striker Chris Wood an nei. Kum 25-a upa striker hian season hman zawh takah khan Leeds tan goal 30 ngawt a khung a, Mexico lakah inthlahrun a tum lo ang.