UCL awttu David Silva
David Silva chuan Champions League nomawi chawi a chak thu a sawi a, Europe-a club te inelna sang berah a champion a nih chuan inkhelh a chawlhsan zui mai theih thu fiamthuin a sawi zui bawk.
Spain international Silva hian an ram chu World Cup leh Euro-ah a hlawhtlinpui tawh a, club inelna lamah Manchester City chu Premier League leh FA Cup nomawi a chawi pui tawh bawk - Champions League erawh a hmabak langsar a ni mek.
Kum 31-a upa Silva chuan, "City-ah hian ka hlim a, he hmunah hian a rei thei ang ber khelh chhunzawm zel ka duh. Ka hun tawp thleng a awm pawh ka duh, mah se Premier League hi a hautak em avangin engtiang chena rei nge ṭha takin ka khelh theih ang tih ka sawi thei lo," a ti.
Season hmasa ṭan dawn khan City hian Barcelona leh Bayern Munich manager hlui Pep Guardiola an lalut a, player langsar ṭhenkhat lalut bawk mah se beisei angin season an hmang lo. League-ah palina niin Champions League group stage khel turin playoff an paltlang phawt a ngai.
Silva chuan sawi zuiin, "Season hmasa khan nomawi engmah kan chawi lo a, chuvangin Eihad Stadium-a ka season hman tawh zinga a ṭha ber a ni lo. Mahse season tharah hi chuan hma kan sawi ngei ka ring, intuaitharin kan tum ber chu nomawi lian tham chawi a ni," a ti. Spain tana match 113 khel tawh hian Champions League nomawi an chawi a nih chuan inkhelh chawlhsan zui hial a hreh loh thuin a thusawi tlang a kawm a ni.