England U21 an comeback

European Under-21 Champion­ship semifinal lut turin England chuan match hnuhnung bera Poland hneh chiah an mamawh ta - Three Lions hian Thawhṭanni zan khan Slovakia lakah goal chhuah hmasa zet mah se an 'comeback' a, 2-1 in an hneh.

Slovakia tan Martin Chrien chuan minute 23-na lekah goal hmahruai a khung a, chawlhlawk hman a nih thlengin England-in a sutna tur goal an nei thei lo. Mahse, second half khelh ṭan a nih hnuah England-in thu ṭha an ngaithla tih an pholang a, goal hnih an khung.

Minute 50-naah Swansea Ci­ty defender Alfie Mawson chuan si phurh sutna goal a khung a, Southampton forward Nathan Red­mond chuan minute 61-naah chakna goal a khung chhunzawm ve lehnghal - Redmond hian England U21 tan goal 10-a khungna chiah a ni.

Group A inkhel dangah Poland U21 leh Sweden U21 chu goal khat ve ve khunga an inhnehtawk avangin England-in table chung ber an luahlum mek. Euro U21 inelnaah hian group pathumah team pali ṭhen hran an ni a, group tina hmahruaitu bakah pahnihna zinga ti ṭha ber pakhatin semifinal an khel dawn.

England hian point li hmu mekin an hnua chiaha awm Slovakia-in point thum bak an nei lo a, match khat chiah khelh tur a awm tawh avangin England-in semifinal lut tura an mamawh zat chu point thum chiah a ni.