Goa tan semifinal hmun a chiang ta

Indian Super League semifinal khel tur team pakhat a chiang ta a, FC Goa chuan coach nghet nei lo chunga Hyderabad FC 4-1 a sawpin semifinal an lut. 

FC Goa hian league match 16 aṭangin point 33 an nei a, palina aia hniama an awm theih tawh loh avangin semifinal khel turin an dinhmun a chiang ta a ni.

Goan club tan Hugo Boumous leh Ferran Corominas ten goal hnih ve ve an khung a, Hyderabad club tana Marcelinho goal khungin awmzia a nei lo. 

Marcelinho-a'n goal a khung hian Boumous-a'n goal hnih a khung tawh a, 2-1 a ni. Mahse, mikhual team beiseina chu Coro hian a rawn tihralsak a, minute 68-naah goal thumna khungin hun tawp nan minute thum chauh a awm tawh tihah penalty aṭangin a khung leh bawk. 

Goa coach lailawk Clifford Miranda chuan, "Top four-a awm hi kan tum sa a ni a, kan ti hlawhtling thei hi ka lawm hle. He club tana Sergio Lobera hnathawh kha kan hre reng a, he team hi ama din a nih avangin theihnghilh a harsa a ni," tiin coach ban tak chungchang a sawi.