Volleyball thiam ber Hunthar Veng
Mizoram volleyball inelna sang ber, GIG Motors Pro Volleyball League final-ah Hunthar Veng chuan Chhing Veng 3-1 a hnehin champion nomawi an chawi.
Thawhlehni zan khan R. Dengṭhuama Indoor Stadium-ah a hmawr bawkna hi neih niin inkhel hmuhnawm takah Hunthar lamin 25-23, 20-25, 29-27, 25-20 in hnehna an chang a, player hmuhnawm Lalbiakmuana chu Mizo Best Player atan thlan a ni.
Thawhlehna
Nikum November thla khan Mizoram Volleyball Association hnuaia inelna pakhat Invitation Tournamnent final-ah Chhinga Vengin Hunthar Veng hnehin nomawi an chawi. PVL-ah pawh Chhinga Veng hian an match hmasa berah Hunthar bawk hi 3-0 in an hneh leh a, set hloh nei loin final an lut.
Hunthar lam hian ke na vanga semifinal lama an chhawr theih loh captain Remsangzuala chu final-ah hian a lo kir a, Santhosh Kodakkal-a'n point 27 a neih theih nan leh Sarang S Lal-a'n point 21 a hlawh chhuah theih nan setter Remsanga hi a ṭangkai hle. Nomawi chawi tur hian a zawnin match nga hnehna an chang thei.
Chhinga Veng tan India captain hlui Gurinder leh World Cup vawi thum khel tawh Mandeep ten ni dang an phak lo a, state pawn player pahnihin beisei an phak loh zanah tualchhung player an chefuh thei bik lo, rinkai ni chungin pahnihnaah an lungawi a ṭul.
Chhinga Veng coach Eric Lalsangliana Pautu hian tun hnaiah sulhnu a nei ṭha hle, season hmasa khan PVL-ah Anastasia a champion pui bakah tun season hmeichhe inelna lamah Power Department Sporting Club nomawi a chawi pui bawk, nomawi lian pathumna chawi tur erawhin season thar a nghah a ṭul.
Coach a lawm
Hunthar Veng coach Vanlalmawia chuan, "Pathian vang chauh a hetiang dinhmun thleng thei hi kan ni. Player leh coaching staff-te thawhhona a ṭha a, hemi piah lamah veng mipuiin min phur pui em em bawk. Kan thawhrim vanga nomawi kan chawi theih avangin kan lawm takzet" tiin Vanglaini a hrilh.
Tualchhung volleyball-ah Hunthar Veng hian sulhnu an nei ṭha ṭhin, tun hmain CYMA leh Inter Branch lamah an hlawhtling tawh. Tun hnaiah an tla hniam deuha ngaih a ni, season hmasa khan PVL-ah pathumna an ni a, tun season-ah erawh tun hma lama an ropuina ang nei let lehin nomawi an chawi leh ta.
Engtin zel?
Kar hmasa khan MVA chuan season tharah PVL neih leh tur a nih thu an ti chiang tawh a, inelna lianah hian team paruk an tel tawh ang. Kumina inlan team panga - Hunthar Veng, Chhinga Veng, TNT, Muanna Veng, Ramhlun Sporting Club leh 3rd MAP te chu an tling leh nghal vek.
Hmun ruak pakhat la awm hi playoff hmanga hnawh khah tur a ni. July 3-6 chhunga neih tur playoff-ah hian Mizoram chhunga volleyball club tawh phawt chu an tel thei dawn, club tel tur tan veng emaw khua emaw behchhan neih a ngai thung a, June 30 ral hmain MVA general secretary hnenah inhriattir tur a ni.
Lawmman
Champion : Hunthar Rs 1,00,000
Pahnihna : Chhinga Veng Rs 60,000
Semifinalist : Ramhlun SC Rs 35,000
Semifinalist : TNT Rs 35,000
Pangana : 3rd MAP Rs 20,000
* Inkhelh apiangin a chak zawkin Rs 1000 a dawng a, a chak lo amin Rs 500 an dawng zel thung.
Mimal Chawimawina
KT Panasonic Mizo Best Player : Lalbiakmuana, Hunthar
KT Panasonic Best Spiker : Gurinder Singh, Chhinga Veng
KT Panasonic Best Blocker : Sarang S Lal, Hunthar
KT Panasonic Best Setter : Remsangzuala, Hunthar
KT Panasonic Best Libero : Lalbiakzauva, Hunthar