East Bengal-ah Khalid
I League-a Aizawl FC champion puitu Khalid Jamil-a'n Mizo club chhuahsan a tum loh thu sawi tawh mah se nimin khan season hnih chhunga vaibelchhe 1.25 hlawh turin East Bengal-ah contract a ziak.
Mumbai FC coach hlui Khalid hi I League-a Indian coach awm tawh zinga hlawh tam ber a ni dawn a, hetiang dinhmuna a din theih chhan hi season liam taa Mizo club a champion pui vang a ni.
AFC pro licence nei Khalid hian season sarih chhung Mumbai FC a enkawl a, result ṭha bik neih pui lo mah se I League-ah club vantlang a ni. Nikum khan Mumbaikars hian Khalid banin Santosh Kahsyap an lalut a, I League aṭangin an relegate. Hetihlai hian Aizawl FC erawh Khalid kaihhruaina hnuaiah an champion thung.
I League awm hnuah kum 97-a upa club East Bengal an la champion lo a, hei vang hian Mizo club thlen chin rah phak ve tumin Khalid an thlem thlu. Hemi hma hian Kolkata club lian hian AFC player pawimawh Lalramchullova, Brandon Vanlalremdika leh Mahmoud Al Amna te an la tawh bawk.
MFA buatsaiha Mizo mipuiin Lammuala I League champion Aizawl FC team an hmuah ṭumin Khalid chuan, "Aizawl FC hi ka chhuahsan lo ang, he club hi nuam ka ti," tiin a hmalam hun chungchanga Vanglaini zawhna a chhang.
Amaherawhchu Khalid-a'n contract pawhsei a tum lo tih hriat a ni a, phai lam media chuan Mizo club-in contract an zawrh loh vang niin an ziak thung. Hemi chungchang hi sawifiahin AFC technical director Hmingthansanga chuan, "I League zawh rualin a thuphungin kan sawi tawh a, Federation Cup zawhah pawh contract kan zawrh a, chhanna mumal kan hmu lo. Kan president-in telephone kaltlanga biak a tum pawhin a chhang lo a, hemi chungchangah hi chuan a professional tawk loin ka hria. Kum khat chiah kan bulah contract a ziah avangin kan thu hnuaiah a awm tawh lo a, kan chunga a hnahthawhah lawm mah ila a chhuah dan hi chu a lungawi thlak loh," tiin chhanna mumal an dawn loh avanga a lawm loh thu a sawi.
Khalid chuan, "Aizawl FC chungah lawm lohna pakhatmah ka nei lo a, ka chunga an ṭhat avangin ka lawm em em zawk a ni," tiin Mizo club a sawi chhe duh lo a, a thusawi a zuk chhan erawh a sawi zau duh lo thung.