Ramhlun South-in Chhinga Veng an hneh

Ramhlun South coach HC Zarzoliana chuan, "Team ṭha zawk an vannei ṭhin," tiin Vanglaini a hrilh a, nimin Lammual inkhelah 2008 CYMA Football champion hian NECS Cup Champion lai Chhinga Veng chu aggregate-ah 2 - 1 a hnehin TṬ Royte Trophy final an lut.

Nimin inkhelah hian Ramhlun South forward Lalthlamuana'n goal awm chhun a khung a, Chhinga Veng­in goal an khung ve lo. Kumin Inter Branch YMA Football Tournament-ah team 141 an tel a, tunah chuan team hnih chiah an dam ta. June 23, Zirtawpni hian Lammualah Ramhlun South leh Chanmari ten CYMA Football final an khel ang.

Sawmfela-te unau

Ramhlun South coach Zara'n inkhel pawimawhah sa huai a ser tur thu a sawi a, Malsawmfela te unau paliin inkhel bul an ṭan vek. Goal khung kawngah Sawmfela thlawp turin Lalthlamuana leh Lalnunmawia te dah luh a ni a, unau zinga naupang ber Eric Pazawna chu tlarhnung bang rinawm zinga mi a ni.

First half inhneh­tawk takah Chhinga Vengin goal khungna chance an ngah zawk mah a, Lalkhawpuimawia'n vawi thum chance neiin goal ban per chu a chance ṭha pathum zinga goal teuh ber a ni.

Ramhlun South erawhin an hun ṭha neih an hmang ṭangkai - minute 40-naah Sawmfela ball fing tak chu a chhang chiah Mawitea'n tlan luhpuiin cross ball

ṭha tak siamin a chhang leh chiah Thlamuana'n a khung! Ramhlun South chakna goal-ah Power Dept football team striker ṭhin Vanlalliana fate pathum an inpe kual!.

Second half-ah Aizawl FC defender Zohmingliana Ralte kaihhruaina hnuaiah Ramhlun South tlarhnung an ding khawng a, Chhinga Vengin an su nghing thei meuh lo.

Chutihrualin minute 10 vel chiah a awm tawh tihin Chhinga Vengin sutna hun ṭha bik an nei a, cross ball ṭha tak chu goal ruakah Lalnunsanga'n goal zawnah a tauh thei lo.

Ramhlun South forward Lal­awmpuia'n goal khung theihna chance ṭha a nei ve leh nghal a, amaherawhchu DSK Shivajians forward hian chak nemnghehna goal a khung thei bik lo. Minute 90 chhung inkhel hmuhnawm takah goal khat bak a lut lo a, Ramhlun South an ding chang.

Semifinal

1st leg : June 19, Thawhṭanni

Ramhlun South 1 - 1 Chhinga Veng

RAM : Malsawmfela 23'

CHH : Lalnunsanga 86'

2nd leg : Nimin Inkhel Result

Chhinga Veng 0 - 1 Ramhlun South

RAM : Lalthlamuana 40'

Aggregate-ah Ramhlun South 2-1 in an chak