Mizoram thlen hlan kan nghakhlel - Renedy

July 1-ah India rama footballer intelkhawm pawl Football Players' Association of India (FPAI) leh Mizoram XI-in exhibition match RG Stadium, Mualpuiah an khel dawn a, FPAI Awards semna neih a ni nghal bawk ang. He hun hmanga lokal tur FPAI president Renedy Singh chuan Mizorama inkhelh hlan an nghahlelh thu Vanglaini a hrilh.

Player a nih laia India tana vawi 56 inlan thei midfielder chuan, "Mizoram lo thlen hlan kan nghakhlel takzet a ni. He state-in Indian football-a a hnathawhte hi kan hmuh hmaih lo a, keini chuan hei hi kan lawmthu sawi ve theihna niah kan ngai. Kan inkhel aṭanga kan sum hmuhte pawh kan tih theih a tam lo tih hre chungin tun hnaia Mizorama chhiak tawkte tan kan hlan dawn a ni," a ti.

Player a nih laia East Bengal leh Mohun Bagan tan pawha lo khel tawh Renedy chuan, "India rama kan player neih ṭhat ber ber kan thawhchhuahpui dawn a, Mizo mipuite tan inkhel hmuhnawm tak chhawpchhuah kan duh. Exhibition match a nih avanga tih mai mai kan tum lo," a ti a, Mizo mipuiten Indian player ṭha intelkhawmin an theihna sang bera an khel lai hmuh an phu thu Vanglaini a hrilh.

Renedy chuan Indian football legend Bhaichung Bhutia pawh Mizoramah hian a lo kal tur thu a sawi a, June 30-ah Mizoram an rawn thleng ang.

Mizoram XI leh FPAI XI inkhel en man hi Rs. 100 leh Rs.200-a ni ang.