Andre Ward-a'n Anthony Joshua a cho

WBO, WBA leh IBF light hea­vyweight champion Andre Ward chuan ropuina dang hlawh chhuak turin weight division sang zawka inhnek chu thil theih tak a nih tur thu a sawi. Ward hian Inrinni khan light heavyweight-a a kawnghren kawl lai pathum hi Sergey Kovalev lakah a humhim a ni.

Ward-a'n a kawnghren a hum­­him hnu lawkah a coach Virgil Hunter chuan a boxer chu cruiser­weight emaw heavyweight-ah pawh a inhnek theih tur thu a sawi a, tun hnaia heavyweight titi luahtu Anthony Joshua hneh tur pawha a rin tawk thu a sawi.

Kum 33-a upa Ward chuan, "Joshua hi heavyweight champion leh pa tak mai a ni a, mah se ka coach-in ka hneh theih a ring a ni. Thil theih loh tak tak hi a awm lo a, Anthony Joshua zah lohna ni lo se Virgil-a'n a ngaihdan a sawi hi ka ṭawmpui a ni," tiin British boxer chu a hneh theih a inring.

Ward chuan sawi chhunzawmin, "Ka hmabakah cruiserweight leh heavyweight a inhnek tura rih belh hi thil theih a ni a, a awlsam dawn em? tih zawhna a awm erawh chuan 'Awlsam lo ang' tih hi a ni tawp. Risk a sang em? in tih chuan, 'Aw' tih a ni leh mai a, Miin mawl an ti che ang em? tia zawhna a awm a nih pawhin 'Aw' tih tho hi a chhanna chu a ni," a ti a, a hmaa chona inchhawp chu thil awlsam a nih loh thu a sawi.

Light heavyweight champion a nih hmaa super middleweight champion lo ni tawh Ward hian WBC light heavyweight kawnghren kawltu Adonis Stevenson chu mipuiin an inhnek an hmu chak a nih chuan a hmachhawn tur thu a sawi bawk.