Argentine champion Boca Juniors

Boca Juniors chu a vawi 32 nan Argentina-a club football inelna sang ber Argentine Primera Division champion an ni. Vawi 36 champion tawh River Plate chiah nomawi chawi hnem lamah tluk loh an nei ta.

Pathianni khan Boca Juniors hian Aldosivi 4-0 in an sawp a, an la champion lo. Mahse, nimin zing khan an hnuai chiaha awm Banfield chu San Lorenzo lakah si khat faiin an tlawm, inkhelh hmabak pahnih la awmah Boca Juniors umphak thei an awm tawh lo.

Boca Juniors hian league match 28 an khelh tawhah point 59 hmuin table chung berah an awm, an hnuai chiahah hian point 44 hmutu Banfield an awm a ni.

Boca-in nomawi an chawi theih nan hian forward Dario Benedetto chu player pawimawh a ni, kum 27 mi hian goal 18 a khung bakah assists vawi thum a nei bawk. Ani bakah hian kum 21-a upa Cristian Pavon chuan goal kua khungin player langsar a ni bawk.