Zanin 11:30-ah Germany Vs Chile

FIFA Confederations Cup-ah Germany-in rawlthar rual an thawhchhuah pui a, Chile-in an team ṭha ber an tir thung. Zanin dar 11:30 hian 2014 FIFA World Cup champion leh Copa America champion an inhmachhawn dawn a, Group B inkhel dangah Australia leh Cameroon te zanin dar 8:30 hian an inkhel bawk ang.

Inkhel hmasa

Australia leh Cameroon ten an match hmasa berah Germany leh Chile an hneh loh avangin zanina chak zawkin semifinal beiseina an nei ang a, chak lo zawk tan beisei tur a awm tawh lo ang.

Asia khawmualpui aiawh Australia hian Confederations Cup match hnuhnung paliah an chak lo vek a, kum 2005-a Germany-a inelna neih a nih ṭum kha an tel hnuhnun ber niin group stage match thumah an chak lo vek.

Socceroos hian vawi nga chak lo Saudi Arabia tluk pui thei dinhmunah an ding a, a zawna vawi riat chak tawh lo New Zealand record erawh an hlat deuh. Australia hian Cameroon hi an hneh thei a nih chuan kum 2001-a pathumna inchuhna Brazil an hneh hnua an chak lehna hmasa ber a ni ang.

Australia squad-ah hian Tim Cahill a la awm a, Everton midfielder hlui hi kum 37 leh ni 198-a upa a ni tawh a, goal a khung a nih chuan kum 38 leh ni 129-a upa nichunga goal khung thei Lothar Matthaus chiah a tluk dawn lo tihna a ni.

Cameroon coach Pascal de Miramon chuan, "Kan khelh danah ka lungawi a, kan result-ah erawh ka lawm lo," tiin Chile an hneh loh zawha a sawi a, Socceroos lakah pawh hian starting eleven ngai bawk a chhawr a rinawm. 2017 CAF Africa Cup of Nations-a player of the tournament Christian Bassogog-a'n Chile lakah beisei a pha lo a, zaninah a theihna phochhuah a tum dawn a ni.

En châkawm

Inelna ṭan hauh hmain Germany leh Chile hi Group B aṭanga semifinal lut tura rin an ni a, point thum ve ve an hmuh tawh avangin zanina chak zawk hian knockout stage an lut nghal lo a nih pawhin an tlak a rinawm tawh loh.

Germany coach Joachim Low-a'n inelnaah bul an ṭhat thu sawi mah se tlarhnung lam thawm ṭhat a ngai tih erawh a hmuh hmaih lo ang. Die Mannschaft hian Socceroos lakah goal hnih an chhuah a, goalkeeper Bernd Leno chu mawhphurtu niin lang mah se coach Low chuan vawi khat chauh a tihsual thu a sawi thung. Bayer Leverkusen keeper Leno thlakna tur hian Barcelona keeper Marc-Andre ter Stegen leh PSG keeper Kevin Trapp te an awm a, mi thar an inlan a rinawm.

Chile-in an match hmas ber an khelh ṭumin an thiampuipa Alexis Sanchez chu bench-ah an dah a, Gunners forward luh hnuah goal hnih an khung. Copa America best player Alexis hian bul a ṭan tawh dawn avangin club tana khelhpui Shkodran Mustafi hna a hau tak sawt dawn. Low-a'n tlarhnung tiphui tura tawnhriat ngah player a hmang duh a nih chuan Liverpool player Emre Can en kan theih a rinawm loh.

La Roja tan Arturo Vidal a pawimawh leh dawn a, Bayern Munich midfielder hian club tana a khelhpui Joshua Kimmich te a hmachhawn dawn a, season thara a teammate tur Sebastian Rudy leh Niklas Sule te nen an intawng bawk ang.

Team pahnih hian attacking football an khelh ve ve a rin­awm a, kum lama upa zawk Chile chu chak tura rinkai zawk ni mah se Germany chu an inkara sulhnu nei ṭha zawk an ni. Germany leh Chile te hi World Cup-ah ṭum thum an inhmachhawn tawh a, Die Mannschaft hian kum 1962 (2-0), 1974 (1-0) leh 1982 (4-1) ah te an hneh vek a, kum 2014-a friendly match an khelh ṭumin Low-a naute hi Mario Gotze goal hmangin 1-0 in an chak.

Germany coach Low chuan, "Chile chu team dang daih an ni tawh dawn a, minute 60 ṭha taka khelh chauh kan mamawh lo a, minute 90 chhung ṭha taka khelh kan mamawh. Khawvela team ṭha ber zinga mi an ni a, mimal tin an ṭha bawk a ni," tiin an khingpui tur a dah sang hle.

Chile coach Juan Antonio Pizzi chuan, "Germany-ah ka inkhel tawh a, German tawhkhirh zia hretu a ni. Anni hian khelh dan phung nghet an nei a, khelmual kan luh veleh insiamrem vat kan mamawh dawn a ni," tiin a ṭawng fimkhur hle.