Liverpool leh Salah an inhnaih
Premier League club Liverpool chuan Mohamed Salah an hawisan tawh nia sawi hnuah Roma winger an lo la beisei reng a, Egypt international chungchangah Roma chu pound maktaduai 39-in inremna an neihpui hnai tawh nia sawi a ni.
Kum 25-a upa midfielder hi Reds boss Jurgen Klopp chuan transfer bazar inhawn rualin a rim nghal chat a, pound maktaduai 39 hian inremna an siampui thei a nih chuan African player zinga manto ber a nih bakah Reds-in player mal tana pawisa an sen hnem ber ṭum a ni ang.
Liverpool hian kum 2011 khan Andy Carroll chu Newcastle United aṭangin pound maktaduai 35-in an lalut a, tun thlengin Reds player ni tawh zinga manto ber a nih rih. Tun dinhmunah African player zinga manto ber chu Sadio Mane a ni a, Senegal international hi Liverpool chuan season hmasa ṭan dawn khan Southampton aṭangin pound maktaduai 34-in an lalut a ni.
Serie A khelh zawh taka Roma-in pahnihna dinhmun an luah theih nana league match 31 khela goal 15 khungtu Salah hian kum 2014 khan Liverpool a lo pan ṭep tawh a, mahse Chelsea lamah kalin London club hi pound maktaduai 11-in a zawm.
Premier League-a beisei a phak loh hnuah Fiorentina leh Roma tan loan-in a khel a, season hmasa khan Roma hi pound maktaduai 15-in a nghetin a zawm. Liverpool hi a pan a nih chuan kum li chhung cham tura contract ziak tura beisei a ni.