Pogba chungchangah Manchester United an him

FIFA-in nikum August thlaa Manchester United-in Juventus aṭanga Paul Pogba an lak dan chungchangah English club tihsual an hmu lo a, Italian club erawh chhui zui an ni dawn.

Thla hmasa khan FIFA chuan club pahnih hi pound makta­duai 89.3 inrawlhna transfer chungchangah insawifiah turin a hriattir a, Pogba agent Mino Raiola chuan pound maktaduai 41 a hlawh nia hriat a ni.

FIFA thupuangtu chuan, "Man­chester United an fimhlim a, Juventus erawh chhui zui an ni dawn. Thubuai kal lai a nih avangin hei bak hi chu puanchhuah a rem lo," an ti.

Khawvela football neitu sang ber hian third-party ownership tihtawp an tum a, hetichung hian hmun ṭhenkhatah chuan a ruka kalpui renga ngaih a ni. Pogba chungchangah pawh hian Raiola hi French midfielder neitu zinga mi a nih avangin agent fee ringawt ni loin player neitu a nihve avangin sum ṭhahnem tak a changa ngaih a ni a, hei hi an chhui zui tur chu a ni.

Pogba agent Raiola hian an puhna hi a pha tawh a, nikum khan Dutch agent chuan third party ownership a nih loh thu a sawi a, hlawkna erawh a chan ngei thu a sawi thung.

Kum 24 mi Pogba hian kum 2009 khan Le Havre aṭangin United a zawm a, kum 2012-ah Juventus panin English club hian zângnadawm nan pound maktaduai 1.5 chiah an dawng. Nikum nipui khan French midfielder hi United-ah khawvel manto ber ni turin a let a, Red Devils hian French midfielder hi a chet ṭhat dan a zirin Serie A club hi pound maktaduai 4.5 a la pek belh thei a, contract thar a ziah belh chuan hetiang zat tho hi an la pek belh thei bawk.