Match 1100 chak thei Federer

Halle-a neih Gerry Weber Open -ah Thawh­lehni zan khan Roger Fe­derer chuan Yuichi Sugita chu minute 51 chhung lekin 6-3, 6-1 in a sawp. Kum 35 mi Federer tan ATP Tour-a match 1,100 hnehna a channa a ni chiah bawk.

Grand Slam vawi 18 champion tawh Federer chuan, "Sugita nen kan vawi khat inkhelhna a ni a, a vannei zawkah ka ṭan avangin ka lawm hle. Stutt­gart-ah khan mellung pawimawh hi phun theih­na hun ka nei, mahse ka hlawhtling lo. Tunah erawh match 1,100 ka chak theih avangin ka lawm a, chhunzawm zel pawh ka tum ang," a ti.

Mipa tennis player zinga major title la hnem ber tawh Federer hian grass court season hman

ṭhat a duh avangin kumin­ah clay court-ah a inlan miah lo. July 3 aṭanga khelh ṭan tur Wimbledon-ah a champion thei a nih chuan a vawi riatna tur a ni dawn a, record thar a siam ang. Swiss star tan Halle-a chet ṭhat hi a pawimawh leh dawn hle.

Japan tlangval Kei Nishikori chuan Fernando Verdasco chu 6-7 (7), 6-3, 6-4 in a hneh. Seeded pathumna Nishikori hian a khingpuiin break point vawi 10 a hmuh zinga vawi kua ngawt a pawtthla thei a ni, second round-ah chuan Karen Khachanov nen an inhmachhawn leh ang. Russian star Khachanov hian Gilles Simo 6-2, 6-7 (2), 6-3 in a lo hneh ve thung a ni.

Inkhel dangah seeded palina Alexander Zverev-a'n Paolo Lorenzi 6-3, 6-2 in a hneh. German veteran Tommy Haas chu Gerry Weber Open a khelh hnuhnung berah Bernard Tomic lakah 6-4, 6-4 in a chak lo. Kum 39-a upa Haas hian kum 20 liam ta khan he hmunah hian inelna a hma­chhawn ṭan a, ṭum hnih a champion tawh.

Seeded pasarihna Ro­ber­to Bautista Agut, Robin Haase, Mischa Zverev leh Florian Mayer te chuan hnehna an chang vek bawk.