Murray-a hoin player langsar an tla

Grand Slam ngaihhlut hlawh Wimbledon inbuatsaihna tour­nament langsar Aegon Cham­pionship-ah champion lai Andy Murray chu a match hmasa berah a chak lo nghal a, player langsar dang Milos Raonic leh Stan Waw­rinka te pawh first round-ah an zinkawng a tawp ve nghal bawk!

Murray a tla

Queen's Club, London-ah world number 1 Murray leh num­ber 90 Jordan Thompson te an in­hmachhawn a, Britain tlangval hi harsatna nei loa tlang tura ngaih a ni.

Mahse, beisei ang ngawt a ni lo. Inhliam vanga Aljaz Bedene a khelh theih loh vanga khel ve thei chauh Thompson hian darkar khat leh minute 43 an inkhelh hnuah 7-6 (7-4), 6-2 in hnehna a chang.

Aegon Championship-ah hian Murray hi vawi nga a champion tawh a, first round-a a chak loh hnuhnun ber chu 2010 kha niin Mardy Fish lakah a tlawm. He grass court bikah hian kum 2014 hnu lamah hneh loh a la tawng lo a, kum 2013 leh 2016 khan Aegon leh Wimbledon a chawi kawp thei hial.

Kum 30-a upa Murray chuan, "He hmunah hian result duhawm tak tak ka nei tawh ṭhin a, chu chuan a hnu zel atan pawh inrintawkna ka neih phah ṭhin bawk. Tun hnaiah ka khel ṭha hleithei lo, hma ka sawn lo a nih chuan Wimbledon-ah pawh ka hlawhtling lo ang. Mahse, insiamṭha turin hun ka la nei," a ti.

Barakhaih dang

Grand Slam vawi thum cham­pion tawh Wawrinka chu Spain tlangval Feliciano Lopez lakah 7-6 (7-4), 7-5 in a tlawm. Swiss star hi French Open final-a Rafael Nadal hneh lo hlim kha a ni a, Roland Garros hnua tournament a hmachhawn lehna hmasa berah beisei a phak lo hle.

Kum 32-a upa Wawrinka hian Queen's Club-ah record a nei

ṭha hran lo, a inkhelh hnuhnung pangah vawi li ngawt a chak lo, a kum zawnin first round-ah a tla ta a ni. Wawrinka hi clay leh hard court angin grass-ah a hriam tawk lo tihna a ni.

Inkhel dangah season hmasa finalist Milos Raonic pawh Thanasi Kokkinakis-a'n 7-6 (7-5), 7-6 (10-8) in a hneh. Canadian tlangval Raonic hnehtu hi a ranking a hniam em avanga main draw pawh khel phak lo, wildcard an pek avanga inlan ve thei chauh a ni.

Kum 21-a upa Kokkinakis hi rawlthar beisei awm tak a ni ṭhin, kum 2015 khan naupangte ni chungin world number 69 a ni thei. Mahse, a dar (shoulder) hliam zai a ni a, he mi hnuah a pum na vangin a buai chhunzawm leh - kuminah match nga chiah a la khel thei a ni.