Mizoramin final lut

CAPF U19 Tournament North East Zone-ah Mizoram mipa team-in final lut turin nimin khan Meghalaya 1-0 in hneh a, nomawi inchuhna hi June 24-ah neih tur a ni. Vawiin hian Mizoram hmeichhe team-in semifinal-ah Manipur an hmachhawn thung ang.

Jawaharlal Nehru Stadium, Shillong-a inelna neihah hian Mizoram mipa team hian group stage-ah Arunchal Pradesh chu goal awm loin an draw a, Khawzawl rawlthar Vanlallawma goal hmangin Tripura hnehin knockout stage an lut.

Nimin inkhelah hian Siaha rawlthar Laldinpuia'n goal awmchhun a khung a, Meghalaya 1-0 in an hneh. Mizoram hian final-ah Tripura 4-0 a hnehtu Manipur an hmachhawn ang.

Mizoram hmeichhe team hian group stage-ah Vanlalhriattiri Boitlung goal hmangin Tripura an hneh a, Meghalaya lakah 3-0 in chak lo mah se semifinal an lut tho. Mizoramin Manipur an hmachhawn ang a, hmeichhe semifinal pakhat zawkah Meghalaya leh Nagaland te an inkhel dawn a ni.

Mizoram team hi Lalsangzuala Hmar leh Lalremruata ten an enkawl a, mipa team coach Remruata chuan, "Mizoram team hi Aizawla inelna neiha district hrang hrang inel ṭuma Assam Rifles thlan an ni a, an thlang ṭha tawk lo. Manipur-ah chuan Neroca player-te an awm nuk a, keiniah chuan Mizoram jersey ha tawh hi tlem te chauh an awm," tiin final thleng mah se Mizoram team ṭha ber an nih loh thu a sawi.