Indian shuttler langsar an chak
Australian Open Super Series khelh mekah nimin khan Indian shuttler langsar PV Sindhu, Saina Nehwal, Kidambi Srikanth leh B Sai Praneeth te chuan an khingpui ṭheuh hnehin second round an inhlangkai.
Kar hmasa lawkah Indonesia Open nomawi chawitu Srikanth chuan a khelh ṭhat chhawm nung zelin Chinese Taipei star Kan Chao Yu chu 21-13, 21-16 in a sawp. Mipa singles inkhel pakhat zawkah Sai Praneeth-a'n Tommy Sugiarto lakah fiahna hautak paltlangin 10-21, 21-12, 21- 10 in hnehna a chang ve bawk.
Second round-ah Srikanth hian Korean shuttler Son Wan Ho a hmachhawn dawn a, Sai Praneeth hi China tlangval Huang Yuxiang nen an inkhel ve leh dawn bawk a ni.
Hmeichhe singles lamah Olympic bronze medalist Saina chuan seeded palina Sung Ji Hyun a hneh. Saina tan Korean nula hi khingpui taktak tura ngaih ni mah se world number 1 hlui hian a theihna sanzia lantirin 21-10, 21-16 in hnehna a chang. Rio Olympic final-a Carolina Marin hneh lotu Sindhu pawhin harsa takin Sayaka Sato 21-17, 14-21, 21-18 in a hneh.
Shuttler langsar pali an chak lai hian shuttler ṭhenkhat - Indonesia Open semifinalist HS Prannoy, Ajay Jayram, Praupalli Kashyap leh Siril Verma te erawh singles-a an match hmasa berah an chak lo thung. Mipa double pair Francis Alwin leh Tarun Kona te pawh first round paltlang zo loin an zinkawng a tawp.