Sunderland-in neitu thar a nei hnai
Premier League aṭanga tla hlim Sunderland neitu Ellis Short chuan a club a hralh hnaih thu a puang a, season thar aṭanga Championship khel tur club lei duh hian company pahnih chuan Black Cats hi an dawr tawh.
Sunderland lei duhtu te hi Germany-a sumdawng intelkhawm pakhat leh Sunderland fans Gabe Turner, Ben Turner leh Leo Pearlman-te an ni a, anni hi television production company Fulwell 73 neitu an ni.
Fulwell 73 neitute hian anmahni sum hmang chauha Sunderland lei hi an tum lo a, USA lam aṭangin sum hmanga puihna an hmu thei dawn a ni. He company hian Black Cats nen inzawmna an nei thuk hle a, an hming Fulwell 73 tih pawh hi Sunderland khelmual hlui Roker Park-a stand pakhat hming chawia an phuah a ni hial.
Kar hmasa Zirtawpni khan Sunderland hian an club lei duhtute nen inbiakna an neih mek thu an lo sawi tawh a, a rang lama engkim chinfel an tum. Tuna Black Cats neitu Short hian May 2009 aṭang khan Stadium of Light-ah hian neitu nihna a lo nei tawh.