Ten Hag-a hoin Manchester United-in khawi kawng nge an zawh dawn?
Manchester United-in manager thar Erik ten Hag an lalut a, Dutch manager hoin chona thar an hmachhawn dawn. Sir Alex Ferguson-a'n team enkawl hna a chawlhsan hnuah Man United-in league nomawi an la chawi leh lo a, kum 2017 hnuah nomawi hrim hrim an la chawi leh lo - hmabak a hautak hle.
Sir Alex leh a thlaktute
Man United manager-te hi khawvela manager hlawhtling ber Sir Alex Ferguson aṭangin an teh ṭhin a, an tling zo ṭhin lo. Scottish manager hian Premier League nomawi 13, FA Cup panga, League Cup pali bakah Champions nomawi pahnih a chawi avangin a ropui bawk em a ni.
Hemi a nih avang hian Sir Alex hi tehfunga hman a rem ta chiah lo a, hriatthiamna neih a ṭul. Chutihrualin eng tehfung pawh hmang se Scottish manager hnua Man United manager-te erawh a khum a ṭul.
Sir Alex thlaktu David Moyes-a'n season khat a daih lo a, tehfung atan a rem lo. Moyes thlaktu Louis van Gaal hi khawvel tactician ropui zinga mi a nia, season hnih chhungin FA Cup nomawi a chawi.
Ten Hag tan nomawi chawi phak ringawt hi a harsa dawn. Chutihrualin Van Gaal an ban chhan hi Champions League an khelh phak loh vangah a ngaih theih a, nomawi chawi chung pawha an ban chhan hi pangana a nih vangah a ngaih theih avangin Ten Hag hian Netherlands coach ni lai hi a khum chu a ngai chiang a ni.
Van Gaal thlakna atan nomawi chawi thiam bik Jose Mourinho an lalut a, Community Shield chawi nghalin League Cup leh Europa League a chawi. Premier League-ah parukna ni mah se Europa an champion avangin Champions League an khel pha tho.
Season hnihnaah erawh league leh FA Cup-ah pahnihna an ni a, an chungah Manchester City chauh awm mah se an inkarah point 19 ngawt a awm. The Special One tiha inchhal Mourinho pawh daih rei hret mah se season hnih leh a chanve a enkawl chuan ban a tawk ta tho.
Ole Gunnar Solskjaer-a'n Mourinho a rawn thlak a, bul a ṭan chhelo. Norwegian manager hian ama puala season bul a ṭanpui hmasak berah Man United hi FA Cup, League Cup leh Europa League-ah semifinal an thlenpui vek a, league-ah pathumna a ni bawk.
Solskjaer hian 2020–21 season-ah Europa League final thleng mah se Villarreal lakah an vanduai a, Premier League-ah pahnihna an nih phak bakah League Cup-ah semifinal an thlen tho avangin beiseina an nei sang thar hle. Season liam ta khan Cristiano Ronaldo an rawn kir a, season bul boruak fuh viau mah se November thlaah chuan Solskjaer hi ban a ngai ta zawk. A thlaktu manager lailawk Ralf Rangnick a fuh chuang loh avangin tun season-ah Europa League an khelh a ṭul phah bawk.
Tehfung chu
Premier League-ah manager ṭha bik Pep Guardiola, Jurgen Klopp leh Antonio Conte te an awm a, champion a har dawn tih chu a chiang sa. Hemi a nih avang hian Erik ten Hag-a hi season khatnaah a champion a nih loh pawhin hriatthiam a ni ngei ang. Chutihrualin Dutch manager hian a naute hi Champions League a khelhphak pui ngei a ṭul ang.
Mahse maw, Champions League khelh phak pawh hi a awlsam dawn lo. Community Shield aṭangin Manchester City leh Liverpool an ṭha tih a chiang tawh a, UCL khel tur chiang saa ngaih an ni. Hmunruak pahnih hi inchuh tur zingah Tottenham, Arsenal leh Chelsea te an langsar a; sum hmang tam leh player nei ṭha an nih avangin UCL khelh phak ringawt pawh hi beih tham fe a ni ang.
Goal venhim lam hi
Man United hian season liam ta khan goal 57 ngawt an chhuah a, Manchester City leh Liverpool (26) te goal chhuah let an chhuah. Insiamṭhat an mamawh hle. Erik Ten Hag-a'n tlarhnung ngai pawimawhin player pathum a lakluh tawh zinga pahnih pawh defender an ni. Ajax aṭangin Lisandro Martínez a lalut a, Feyenoord aṭangin Tyrell Malacia a lalut bawk.
Chutirhualin Man United defence laia awm sa te hi captain Harry Maguire, Sweden captain Victor Lindelof leh tawnhriat nei ṭha Raphael Varane bakah Ivorian defender Eric Bailly leh English defender Phil Jones te an awm. Argentine defender Martinez hi euro maktaduai 67 (£57) man ngawt a ni bawk si a, bench-a dah tur atan chuan a man to hret si, engtin nge a rem ang tih hi hriatthiam har chu a ni ta.
Defender laia inkawp tur hriat duh vangin tun hnaia friendly match pawh an khel tamah a ngaih theih. Atletico nen an inkhelh ṭumin Maguire leh Lindelof te an inkawp a, Vallecano nen Varane leh Martinez ten bul an ṭan thung. Tlarhnungah pathum pawh a hman theih a, chutihrualin Brighton nen chuan pali an awm a rinawm a, Maguire leh Lindelof te chu inkawp hmasa tur an nih rinawm a, bul an ṭan dun reng erawh a rinawm chuang lo.
Mual dinglamah Diogo Dalot-a'n hmun nghet a chan chho mai rinawm a, vei lamah Luke Shaw a awm. FC Porto aṭanga an lakluh Alex Telles pawhin Shaw a tluk phak loh avang leh Feyenoord aṭanga Tyrell Malacia an lakluh avangin a chhuah mai a ṭul dawn. Telles hian loan hmangin Sevilla a pan ang. Chutihrualin Malacia pawh hian Shaw a el pha ang em tih chu hunin a hril ang.
Midfield leh attacking lam ve thung
Manchester United-in nipui transfer-a an player lakluh duh ber Frenkie de Jong an lalut thei lo a, season an ṭan tawh dawn avangin hemi nghawng hi a pawi thei. Harsatna belhchhah turin Cristiano Ronaldo-a'n chhuah a duh a, season liam taa an top scorer hi buaipui tham a tling.
Ronaldo hi buaina tham a tling a, Ole Gunnar Solskjaer pawhin a hna a chan phaha ngaitu an ṭhahnem hle. Ten Hag pawhin thutlukna huaisen a siam a ṭul a, Ronaldo hi paih thla ang em tih chu zawhna a ni a, tuin nge thlak ang tih zawhnain a chhunzawm nghal.
A chhanna chu Anthony Martial a ni a, season liam taa an chhawr duh loh leh loan hmanga Sevilla-a an kaltir a ni. French forward hi Sevilla-ah a hlawhchham a, Man United ṭantute tan phur a har ang. Chutihrualin Jadon Sancho leh Marcus Rashford te an theihna anga an khel chhuak thei a nih chuan United attack hi a hlauhawm ber tur zinga mi a ni.
Season liam ta khan Man United hian goal 57 chauh an khung a, anmahni aia khung tam club pasarih ngawt an awm. Champion zui ta Manchester City phei chuan goal 99 an khung a, an inkar hlat hle. Goal 99 khungtu City hian Erling Haaland an la zui a, United erawhin season liam taa beisei pha lote chungah rinna an nghah a ṭul dawn.
Midfield-ah Christian Eriksen an chang thei a, Danish midfielder hi player ṭha bik a nih avangin United an vannei hle. Mahse, Eriksen leh Bruno Fernandes inkawp rem dan tur hi hriat châkawm chu a ni ta a, Atletico nen friendly match an neih ṭum chuan hun chanve hnu lamah chuan an khel kawp. Theihna nei sang player pahnih hi Ten Hag-a'n an khelh kawp theih dan a zawn a rinawm.
Man United ṭantuten an hmuh châk chu an rawlthar player-te an ni a, FA Youth Cup-a champion puitu Alejandro Garnacho bakah Hannibal Mejbri leh Zidane Iqbal ten first team-ah khelhna hmun an chang thei ang em tih hi a ni. Chutihrualin rawlthar player-te hi chu squad ti chhahtu tur chauh an ni dawn a, midfield laimu tur hi tute nge ni ang tih hi zawhna a la ni reng.
Solskjaer hun lai ang thoin McFred (Scott McTominay leh Fred) te chungah rinna an nghat thei a, midfielder pahnih hi thawkrim mah se anni pahnih hi rinrawl an nih chuan United ṭantute phurna a tla hniam thei hial ang.
Friendly Match
July 12, Thawhlehni
Manchester United 4 - 0 Liverpool
MNU : Jadon Sancho 12'; Fred 30'; Anthony Martial 33'; Facundo Pellistri 76'
July 15, Zirtawpni
Manchester United 4 - 1 Melbourne Victory
MNU : Scott McTominay 43'; Anthony Martial 45+1'; Marcus Rashford 78'; Edmond Lupancu 90' (o.g.)
MEL : Chris Ikonomisdis 5'
July 19, Thawhlehni
Manchester United 3 - 1 Crystal Palace
MNU : Anthony Martial 17'; Marcus Rashford 48'; Jadon Sancho 59'
CRY : Joel Ward 74'
July 23, Inrinni
Manchester United 2 - 2 Aston Villa
MNU : Jadon Sancho 25', Matty Cash 42' (o.g.)
AST : Leon Bailey 49'; Calum Chambers 90+3'
July 30, Inrinni
Manchester United 0 - 1 Atletico Madrid
ATM : Joao Felix 86'
July 31, Pathianni
Manchester United 1 - 1 Rayo Vallecano
MNU : Amad Diallo 48'
RAY : Alvaro Garcia Rivera 57'
Coaching Staff
Erik ten Hag
• Ajax-ah season li leh a chanve a awm a, season tluana a enkawl ṭumin table chung berah an awm vek a, vawi thum an champion. Covid-19 vangin 2019-20 season-ah a chung berah awm mah se an champion lo.
• Dutch Cup-ah ṭum thum final a luhpui a, vawi hnih an champion. Ṭum khat dangah erawh semifinal-ah an chak lo.
• Ten Hag hian a naute nung ṭha takin a khel tir ṭhin a, ball an chan leh chan loh laiin player-ten an tihtur hre bel. An khelh dana pawimawh tak pakhat chu pressing game an khel a, team anga khelh a ngai pawimawh.
Steve McClaren
• Ten Hag-a'n assistant manager atan Ajax-a a hman sa Mitchell van der Gaag bakah English manager Steve McClaren a lalut. Dutch manager hian McClaren a duh chhan chu English football a hriat chian avang te, coach ṭha a nih bakah tawnhriat a neih ṭhat avang te a ni. McClaren hi Sir Alex Ferguson hnuaiah a thawk tawh a, Manchester United hi a hre chiang viau bawk.
Benni McCarthy
• Coaching staff zinga an lak thar ber Benni McCarthy hi Jose Mourinho hoa UCL-a FC Porto champion puitute zinga mi kha a ni a, ani hi forward coach tur niin UCL-a an champion ṭum khan Man United an hneh ṭumin goal a khung.
• McCarthy hian La Liga a khelh laia a hmachhawn ṭhin Pep Guardiola leh Mauricio Pochettino te anga coach hlawhtling nih a duh a, Premier League-a midum manager hlawhtling nih a tum. Player angin football career hlawhtling tak a nei a, Man United coaching staff zinga a tel tur hi ama tan leh club tan chanchin duhawm a ni thei a ni.