SAFF U20 : India-in final khel dawn

South Asian Football Federation (SAFF) Under-20 Championship final khel turin India an inpetkai a, Thawhlehni zan khan Maldives chu 1-0 in an hneh.

India tan Mumbai City winger Gurkirat Singh chuan minute 89-naah inkhela goal awmchhun a khung a, team panga zingah point hmu ṭha pahnihna an nih phak avangin final an khel dawn.

Kalinga Stadium, Bhubaneswar-a neih inelna hi Zirtawpni zan dar 7:00-ah final khelh a ni dawn a, India leh Bangladesh an inhmachhawn ang - India forward Parthib Gogoi chu hun tawp dawnah hnawhchhuah a ni a, final a khel thei lo ang.

Mizo tel lohna India hian an match hmasa berah Bangladesh hi 2-1 in an ngam lo tawh a, Indian footballer ropui ṭhin Shanmugam Venkatesh-a enkawl India tan tun hi phuba lakna hun ṭha a ni.

Thawhlehni inkhel dangah Bangladesh leh Nepal te 1-1 in an inhnehtawk a, buaina tenau a chhuak. Nepal player Dipesh Gurung leh bench-a awm Rohit Subba te red card pek an ni a, Bangladesh lamah Sahidul chu hnawhchhuah a ni bawk.