World Cup thlen tum Argentina, Chile, Uruguay leh Paraguay

Football inelna lian leh ropui FIFA World Cup 2030 chu South American ram pali Argentina, Chile, Uruguay leh Paraguay ten inṭawma thlen an dil, kum 100 a tlin kum tur a nih avangin a bul ṭanna hian thlen an dil a ni.

World Cup hmasa ber hi 1930 khan Uruguay-ah khelh a ni, kum 2030 chu World Cup tan 'centenary' a ni dawn. Spain leh Portugal te pawhin a inṭawma thlen hi an beisei ve bawk.

South American Football Confederation (CONMEBOL) president Alejandro Dominguez chuan, "World Cup 2030 thlen hi kan khawmualpui tan chuan duhthusam a ni. World Cup chu vawi tam tak a la thleng leh dawn.

"Amaherawhchu, a kum 100-na chu vawi khat chauh a ni dawn. Chuvangin a lo chhuahna hmunah kir leh se la tih hi kan duh leh beisei dan a ni," tiin a sawi a, thiam leh ngenngawl takin World Cup thlen an dil.

Argentina hian 1978 khan World Cup hi an thleng, Chile pawhin 1962 khan a lo thleng tawh bawk. FIFA ruahman dan chuan World Cup 2030 thleng tur hi kum 2024-ah tih fel a ni ang, ram dang pawhin dil an la tum thei tihna a ni.

Uruguayan Football Association president Ignacio Alonso chuan, "Kum 100 a liam champhaa World Cup kan thleng leh thei a nih chuan thil inhmeh tak a ni ang," a ti a, an ram ṭhenawm dang pathum nen chuan thlen ngei an tum.

World Cup 2022 chu kumin tawp lamah Qatar ramah khelh a ni dawn. Canada, Mexico leh USA te chuan World Cup 2026 an inthlen ṭawm ang. UK leh Republic of Ireland te erawh chuan World Cup 2030 thlen dil an tumna chu an titawp tawh - Euro 2028 an beisei vang a ni.