Chhuantea'n a boot a khai ve ta

Mizo defender hriat hlawh ber pawl Lalchhuanmawia Fanai chuan inkhelh a chawlhsan thu a puang ve ta a, season tharah chuan Lengpui tlangval hi khelmual chhungah kan hmu dawn ta lo.

Chhuantea hian Punjab club ṭha JCT aṭangin a professional zinkawng a zawh ṭan a, Shillong Lajong, Bengaluru FC, Mumbai City, Pune City, Odisha FC, Chennaiyin leh RoundGlass Punjab tan te a khel hman a, India tan vawi li a inlan hman bawk.

SAFF Championship 2015-a India champion puitu Chhuantea chuan, "Ka nu leh pate an kum a tam ve deuh tawh a, in lamah awmpui ve tawh a ṭulin ka hria. Nupui fanau neiin, Pathian zarah kan chhangchhe chho ve ta bawk a, inkhelh chawlhsan mai a hun tawhin ka hria a ni," tiin Vanglaini a hrilh.

Social media kaltlanga a chawlh thu puangtu Chhuantea chuan, "Ka khup hliam vangin duh ang takin ka khel thei tawh lo a, hei hi ka chawlh chhan a ni bawk. Chutihrual chuan ka professional zinkawng ka zawh ṭantirh khan, tuna ka kum ang zat thleng khelh hi ka tum a, Pathian zarah ka tihlawhtlingin ka hria.

"Hei vang hian rilru dam takin ka chawl a, keimahah hrehawm tihna a awm lo. LBS-Suzuki All Mizoram Inter-Village football tournament hma khan chawl turin thutlukna ka siam sa tawh," a ti a, rilru hahdam taka a professional career a mangṭha thu Vanglaini a hrilh.

Bengaluru tana I League leh Federation Cup nomawi chawi tawh Chhuantea hian social media kaltlangin amah ṭan ṭhintu Mizo mipui chungah lawmthu a sawi a, "A lunglenthlak dawn a ni," tiin a professional zinkawng a mangṭha. Chhuantea hi Mizo midfielder lar Rohmingthanga (Pa Rova) nau a ni.