Supreme Court-in AIFF inthlan dan tur a duang

Supreme Court chuan All India Football Federation (AIFF) thubuaiah inthlanna kalpui dan tur a duang fel ta a, thla thum chhunga AIFF hruaitu lailawk tur thlan a ni phawt ang.

Supreme Court thutlukna ang chuan kumin September thla ral hma ngeiin AIFF hruaitu thar thlan tur a ni a, a thlangtu zingah state tina football association aiawh 36 bakah 'eminent player' (India tana khel tawh) 36 an tel ang - eminent player hi India aiawha vawi khat tal khel tawh chin an ni ang.

AIFF president kal chhuak ta Praful Patel-a'n a hun tawp hnu thlenga AIFF inthlan a buatsaih loh avangin khin an ni a, amah leh a thawhpuite hun chu Supreme Court hian titawpin May-ah khan AIFF enkawltu tur Committee of Administrators (CoA) a ruat a, anni hi AIFF dan thar duang tur leh inthlan buatsaih tura tih an ni.

CoA hian AIFF constitution thar duang turin hma a la a, State FA aiawhte vawi thum a kawm bakah FIFA leh AFC aiawhte nen pawh an inkawm a, anni bakah hian Indian football-a mi hrang hrangte ngaihdan a la khawm bawk. CoA hian National Sports Code mil turin AIFF constitution thar hi a duang a, an dan duan thar ṭhenkhatte chu State FA lamin an khing lêt ve thung a ni.

Inthlana tel thei tur player 36 zinga 24 hi mipa niin 12 hi hmeichhia an ni ang a, India tana an khelh tam dan indawta thlan chhuah phawt tur an ni ang.

Tuna AIFF hruaitu thlan thar tur hi thla thum chhung atana tih phawt an ni ang a, CoA ruahman ang a nih chuan August thla tawpah pawh inthlan hi neih hman beisei a ni.

Kumin October-ah India-in Under 17 Women's World Cup a thleng dawn a, hei hi AIFF hruaitu thlan thar hnuaiah neih tura ruahman a ni. FIFA lam chuan AIFF-in hruaitu thar a thlan vat loh chuan India-a World Cup khelh loh leh India chu ban-ah a vau a, Supreme Court-in hmanhmawh takin inthlan kalpui dan tur hi a duang ta a ni.

AIFF hruaitu thlan lailawkin thla thum an hman zawh hnuah emaw, Supreme Court lamin hun a ruatah emaw AIFF constitution kimchang hi ngaihtuah ṭhat leh tur a ni bawk ang.