Liverpool tan Jota a rinawm

Nipui transfer-a Darwin Nunez an lakluh hnuah Reds-in thawm na tak nei lo mah se, an player pawimawhte an thlung nghet zel a, Mohamed Salah-a'n contract thar a ziah hnuah Diogo Jota chuan kum hnih dang cham chhunzawm turin contract thar a ziak ve leh ta.

Kum 25 mi Jota hian a contract neih lai ang chuan, kum 2025 thleng châm turin Anfield-ah contract a nei a, kum hnih dang a pawhsei tak avangin kum 2027 thleng chu Liverpool tan a khel dawn tihna a ni.

Jota chuan, "Club-in ka chunga rinna an nghahzia pholanna a ni a, kum hnih liam taa he hmun ka pan aṭang khan player pawimawh pawl ka ni thei a, chu chu a tir aṭanga ka duhdan sa pawh a ni reng a ni," a ti.

Portugal international hian kum 2020 khan Wolverhampton Wan-derers aṭangin Liverpool hi a zawm a, a tira a man zat hi pound maktaduai 41 niin, a khelh ṭhat dan a zira £41mtd thlenga sang chho thei tur a ni.

Jota chuan, "Season hmasa khan nomawi zawng zawng beisei thei dinhmunah kan ding a, khatianga tih tawh chuan tih leh zel a, a hma aia ṭhaa tih kha kan duh ṭhin.

"Hlawhtlin zel duhin ka tuihâl a, chu tuihâlna chu ka ṭhianteah pawh a awmin ka hria. Nomawi beisei turin neih ngai chu kan nei vek a ni," a ti.

Jota hian season hmasa khan Liverpool tan match 55 khelin goal 21 a khung a, assist vawi riat a nei. Liverpool a pan hnuah match 85 khela goal 34 khungin assist vawi kua a nei tawh a, FA Cup leh League Cup-ah champion nomawi a chawi tawh bawk.

Liverpool boss Jurgen Klopp chuan, "Striker ni mah se wing-ah a khelh theih bawk avangin duh kan thlan theih phah a, Liverpool a rawn pan hnuah hma a sawn hle bawk. A hma pawhin ka lo sawi tawh a, Diogo hian kan beisei ang ngeiin theihna a nei a, tun aia ṭha lehzual ni turin kan beisei bawk," a ti.

Jota hian contract thar ziak mah se a malpui hliam avangin season bul a ṭan theih a rinawm lo a, Community Shield nomawi chawi hlim Reds hian August 6, tlai dar 5:00-ah Fulham lenchilhin season bul an ṭan ang.

Reds hian Sadio Mane chân mah se Salah chu an chelh thei bawk a, Egyptian forward hi kum thum chhung an hnena châm turin contract an ziahpui a ni.