Vawiinah Chak leh Chak, Chak lo leh Chak lo ; Chawnpui FC Vs Aizawl FC; FC Venghnuai leh FC Bethlehem
I Day Football 2022-ah vawiin hian group A team-te an inlan dawn. Match hmasa bera hnehna chang Chawnpui FC leh Aizawl FC te tlai dar 2:30-ah an inkhel ang a, chhun dar 12:00-ah chak lo pahnih FC Venghnuai leh FC Bethlehem te an inkhel bawk ang.
Group khat aṭangin team pahnihin semifinal an lut dawn. Fixtures kal dan a fuh a, group match tawp ber thlengin inkhel a pawimawh thei ang.
Venghnuai vs Bethlehem
Fan nei ṭha pahnih FC Venghnuai leh FC Bethlehem ten chak loin bul an ṭan a, chak loh zawn an duh dawn lo. Coach Lalrindika Hmar kaihhruai Venghnuaiin an match hmasa berah game ṭha tak an khel a, an chak lo. Chutiang bawkin FCB-in Victor Lalbiakmawia hoin Aizawl FC an chhaih buai pha a, point erawh an hlawh chhuak pha lo.
Venghnuai leh Bethlehem te hi club inbuk tawk an ni. Bethlehem hi tawnhriat nei ṭha Lalrammawia leh Hmingthanmawia ten an ho a, an tlarhnung tih khawng erawh an mamawh. FC Venghnuai hi Vanlalthanga leh Lalrammuanpuia (Apuia) te an awm an ni a, inkhel a hmuhnawm dawn.
AFC Vs Chawnpui
Aizawl FC-in squad an nei ṭha a, I League club an nih avangin player ṭha an hip. Coach Lalrozama Fanai hnuaiah AFC-in chakin bul an ṭan a, FC Bethlehem 4-2 in an hneh. I League club hian point thum hlawh chhuak mah se tlarhnung a phui tawk loa Chawnpui lakah tih phui an tum ang.
Transfer laia thawm nei ring Champhai Kanan champion puitu Lalramsanga leh R. Ramdinthara ten training an zawm tawh a, chutihrualin Chawnpui lakah erawh an khelh a la rinawm lo zawk. I League club khingpui tur hi coach ṭha Lalsangzuala Hmar enkawl an ni a, an tawh a khirh dawn.
Coach Lalrozama Fanai chuan, "Chawnpui hi senior player leh academy player chawhpawlh an ni a, an fitness a ṭha a, chetsual theihna an ni. Hlauh tur phei chu a awm lo a, fimkhur takin kan khel ang," tiin a sawi.
Chawnpuiin Sialhawk right back Lalfamkima an lalut a, AFC nen a inkhelh la rinawm loh. Inter Village final-a man of the match Laltlanzova erawh squad-ah a awm tawh dawn a, Zozoa hi second half-ah chuan hmuh theih beisei a ni. Coach Sanga chuan, "Covid-19 hma MPL ang kha a ni tawh lo. Player zingah hriat loh an awm a, kan la inzir chawp zel. First half-ah inkhel kan chik ang a, second half-ah tih danglam kan tum ang," tiin Vanglaini a hrilh.