World Cup 2022 khelh hun tur a chiang

"Khawvela ennawm ropui ber," tih hiala an sawi FIFA World Cup 2022 khelh hun tur chu puan chian a ni ta a, November 21, tlai dar 3:30-ah match hmasa ber khelh a ni ang. 

World Cup hi nipui laia khelh ṭhin ni mah se kum 2022-ah erawh Qatar boruak avangin thlasikah khelh a ni dawn a, Krismas boruak hnai chho nen inkhelh en nuam lai tak a ni dawn. December 18, zan dar 8:30-ah final khelh a ni dawn a, men rei a ngai dawn lo. December 17-ah pathumna inchuh inkhel a awm thung ang. 

World Cup 2022 group stage-ah hian ni khatah match li zel khelh tur a ni dawn a, inkhel en hun hi Mizo te tan chuan 'duhthusam' tia sawi theih a ni. 

Tlai dar 3:30-ah match hmasa ber khelh ṭhin a ni ang a, zan dar 6:30-ah match hnihna, zan dar 9:30-ah match thumna khelh a ni ṭhin ang. Match tawp ber en tur erawhin men rei deuh a ngai dawn a, zan dar 12:30-ah match thumna hi khelh ṭhin tur a ni ang. Hetihrual hian group stage last round match leh knockout stage-a kickoff hun erawh zan dar 8:30 leh zing dar 12:30-ah a ni dawn thung. 

World Cup group stage match hi ni 12 chhunga khelh zawh vek tura ruahmanna kalpui a ni a, match thum tih loha match dang zawngah chuan ni thum zel chawlh team ten an nei thei dawn. 

Stadium pariatah inelna hi neih tur a ni a, stadium pakhat inkarah vei vah nan darkar khat aia tam hun hman a ngai meuh lo a, hei vang hian fans tan ni khatah match pahnih pawh a en theih dawn tihna a ni. Inelna hi Lusail Iconic Stadium (mi 80,000 lenna), Al Bayt Stadium (60,000), Ras Abu Aboud Stadium    (40,000), Al Thumama Stadium (40,000), Education City Stadium (45,350), Al Rayyan Stadium (44,740), Khalifa International Stadium (40,000) leh Al Janoub Stadium (40,000)-ah te neih a ni ang. 

Tun hnaiah Doha Metro thar hawn a nih avangin fan-te tan veivah a awlsam phah dawn a, World Cup chhung zawngin ram dang anga thlawhtheihna emaw rail hmanga thui tak zin ang kha a ngai ve dawn lo. Al Bayt stadium, Al Khor-ah match hmasa ber hi khelh tur a ni dawn a, inelna thlengtu Qatar an inlan nghal dawn. Stadium hi mipui 60,000 lenna a ni. 

December 18-a final chu Doha khawpuia  Lusail Stadium-in a thleng dawn a, mipui 80,000-in a hmunah inkhel an en thei ang. Al Khor aṭanga Doha hlat zawng hi km 50.3 a ni a, kawng pangngaia motor hmanga kalin minute 50 pawh hman tlin a ngai lo. 

Khawvela ennawm ropui ber ang hiala ngaih a nih miau avangin World Cup 2022 hian khelh hun tur puan a nih rualin ngaihven a hlawh nghal a, engtikah nge ticket an zawrhchhuah ang? tih chu mipui ngaihven hmasak a ni. 

FIFA lam chuan ticket zawrhchhuah hun tur hi chiang takin an la puangzar thei lo a, a hmuna en tum tan erawh inring renga awm a fuh dawn thung - FIFA chuan ticket zawrh hun an puan thuai tur thu an sawi. Ticket hi online hmanga pekchhuah tur a ni dawn a, FIFA.com/tickets lamah ngaihven thei a ni - kumin kum tawp lamah lei ṭan theih a nih a rinawm. 

World Cup 2022 khel tura tling chiang awmchhun chu Qatar chiah an ni a, Asian champion hi a thlengtu an nih avanga tling sa an ni. World Cup qualifier hi khawmualpui hrang hrangin an la khel mek hlawm. 

Europe chu team thawh hnem thei ber an ni a, hmun ruak 13 an nei. Africa-in hmun ruak panga an nei a, South America-in 4.5, Asia-in 4.5 CONCACAF-in 3.5 leh OFC-in 0.5 hmun ruak an nei. Inelna thlengtuin an khawmualpui awmnain hmun ruak an neihsa an tibuai lo.

 

Hmun ruak neih dana 'a chanve' (.5) hi  inter-confederation playoff sawina a ni a, South America, Asia, Oceania leh CONCACAF-a team pakhat ṭheuhin khawmualpui dang team nena playoff khelin hmun an la chuh thei tihna a ni.