Chelsea thawm a ring chho; Werner a chhuak dawn?

Nipui transfer-ah Chelsea duh apiang chu Barcelona-in an lo rim ve emaw tih mai turin London club an che fuh thei lo a, khaw khat tlangval inhal laklawh ang maiin an 'rim' an lo inṭawm leh ṭhin!

Hetiang boruak karah Chelsea an beidawng duh bik lo a, transfer bazar-ah an mit an len ve reng - tun hnai khan Aston Villa rawlthar Carney Chukwuemeka chu pound maktaduai 20-a lalut turin inremna an neihpui a, he thuziak i chhiar meuh chuan an inlalut fel tawh hial mai thei.

Hei chauh a ni lo - Brighton & Hove Albion left back Marc Cucurella chu £50mtd-a lakluh tumin an dawr a, Manchester United hellai Barcelona midfielder Frenkie de Jong an dawr bawk.

Hetihlai hian beisei anga London club-a hlawhtling lo Timo Werner chu Germany lamah a kir dawn nia sawi thawm a awm a, a club hlui RB Leipzig nen Chelsea an inbe mek - he thu buatsaih a nih lai chuan!

Hello Chukwuemeka
Chelsea-in a tawp a tawpah chuan Barcelona an luahlan ve ta - Catalan club chil tiputtu Carney Chukwuemeka chu Aston Villa aṭanga lalut turin inremna an neihpui a, kum 18 mi lek a ni.

English rawlthar duhawm Chukwuemeka hian season hmasa khan Villa tan inelna hrang hrangah match 21 ngawt a khel ve a, goal hnih khungin assist vawi thum a nei.

Thla hmasa lawk khan UEFA European Under-19 Championship-ah England rawlthar rual an champion a, England an champion theih nana player pawimawh chu Chukwuemeka a ni - goal thum a khung.

Villa boss Steven Gerrard chuan thla hmasa khan Chukwuemeka chu contract thar an zawrh thu a sawi a, mahse, Chelsea bakah Barca, AC Milan leh Borussia Dortmund ten an rim Chukwuemeka hian London club a thlang - a la nau deuh avangin inlan tam tura beisei chi erawh a ni lo.

Keeper thar
Chelsea-in keeper langsar Edouard Mendy leh Kepa Arrizabalaga an nei a, mahse, an la duhtawk lo - MLS club Chicago Fire aṭangin goalkeeper Gabriel Slonina an lalut a, a man atan £8.1m an inseng.

Mahse, kum 18 mi lek keeper hian London club a pan nghal dawn lo a, MLS season a hman zawh phawt dawn avangin Chelsea hi January-ah a zawm chauh ang.

Chicago Fire tana season hnih chhunga match 34 khel tawh Slonina man zat hi a khelh ṭhat dan a zira la sang chho leh thei tur a ni a, Chelsea hian pound maktaduai li bawr vel a khelh ṭhat chuan an la pek belh leh dawn a ni.

Slonina chuan, "History ropui tak neitu club ka zawm thei hi ka lawm a, London-a club ṭha ber jersey hak chu a nuam hle," a ti - Stamford Bridge-ah hian kum ruk cham turin contract a ziak.

Sum a tam
Roman Abramovich hnuaiah Chelsea-in sum an ren ngai lo a, an mit châk zawng an hlah ngai meuh lo - club neitu thar Todd Boehly leh a ṭhiante an awm hnuah Blues fans an hlauthawng a, American sumdawng hausate hian sum an thehchhuah tam loh mai an hlau.

Mahse, Boehly leh a ṭhianten sum an ren lo - Raheem Sterling, Kalidou Koulibaly leh Gabriel Slonina lakluh nan ringawt pound maktaduai 90 dawn an seng tawh a, insen belh zel an la tum.

Chelsea hian Man-chester City rim lai Cucurella lakluh ngei an duh a, Spanish full back lalut tur hian £50mtd sen an inhuam - mahse, Brighton & Hove Albion chuan hei aia sang hi an la beisei cheu nia sawi a ni.

Kum 24 mi defender hi centre back-ah a khel thei bawk a, season hmasa khan Brighton tan match 38 khela goal khat khungin, assist vawi hnih a nei a, he thuziak i chhiar meuh chuan Chelsea leh Brighton hi an inrem tawh hial mai thei.

De Jong duhtu
Manchester United-in Barcelona midfielder Frenkie de Jong lakluh an duh a, Catalan club hi inremna an neihpui tawh hial - mahse, Dutch player hian United a pan duh lo a, Erik ten Hag-a'n duh eng ang mah se Old Trafford pan a châk lo.

De Jong-a'n United a pan duh loh chhan hi Barcelona-in a hlawh an la bat nual vang a ni a, Europa League khelh a châk lo nia sawi a awm bawk - Champions League khel tur Chelsea an lo lang zui.

Thomas Tuchel-a enkawl team hian Barcelona nen inbiakna an nei tawh nia sawi a ni a, Dutch midfielder hi lakluh theih ngei pawh an inring - kum 25 mi midfielder hian Champions League khelh a duh miau avangin United aiin London club hi a thlang ve thei.

Red Devils chief executive officer Richard Arnold leh football director John Murtough te chu club pre-season tour meuh ṭhulhin, De Jong lak tum hian Barcelona-ah an lo zin tawh - £63.5mtd pek phawt a, a khelh ṭhat dan a zira £8.5mtd pek belh turin inremna an siam a, mahse, De Jong berin a hai der rih tlat a, tunah Chelsea an lo lang ve leh ta.

Mangṭha Werner?
Timo Werner-a'n June, 2020 khan Chelsea a pan a, £47.5mtd man striker hian Blues a pan hma season-ah RB Leipzig tan match 45 khela goal 34 a khung avangin a chungah beiseina a sang hle - mahse, season hnih a khelh hnuah Chelsea tan match 89 khelin goal 23 chiah a la khung!

Hei vang hian London club hian Werner hi Leipzig-a kir tir leh mai an pawi ti lo a, German club nen an indawr mek. Chutihrual chuan Werner hian kar khatah £275,000 vel a hlawh a, loan hmanga a kir dawn a nih chuan a hlawh a tihniam a nih loh pawhin Chelsea-in a hlawh ṭhenkhat an tum a ngai ang.

Chelsea-in USA-a pre-season tour an neihnaah Werner hian hmun danga a hlim zawk tur thu a sawi thawi a, coach Thomas Tuchel chuan, "Chelsea-a contract ka neih avangin khawvela pa hlim ber pawl ka ni ang," tiin a chhang zui.

Newcastle United chuan Werner hi lakluh an duh ve bawk a, mahse, a hlawh hi Magpies tan pek a harsa dawn niin an sawi - hetihlai hian Werner hian Chelsea chhuahsan turin 50% vela hlawh tihhniam a pawi ti lo tih thlenga sawi a awm ve bawk.