Andy Murray a chak lo nghal

US Open inbuatsaih nan Andy Murray chu Washington Open-ah a inlan a, beissei a phak lo hle. Britain tlangval hi a match hmasa berah Mikael Ymer hneh loin a zinkawng a tawp nghal.

Kum 35 mi Murray hi world number 115 Ymer lakah hian 7-6 (10-8), 4-6, 6-1 in a chak lo. Murray a tlawm nghal lai hian British player dang Kyle Edmund leh Jack Draper te erawh an chak thung.

World number 1 hlui Murray chuan, "Tun aia khel ṭha tur kha chu niin ka inhria, theihna pawh ka neiah ka inngai. Mahse, match ṭhenkhatah hi chuan kan duh leh beisei ang vekin thil hi a thleng thei bik lo," tiin a sawi.

Hmeichhe inelna lamah Venus Williams a inlan bawk. Grand Slam vawi sarih champion tawh hian kum khat deuh thaw hnuah singles match a khel ve leh chiah a, a match hmasa berah Rebecca Marino chu 4-6, 6-1, 6-4 in a ngam lo nghal.

Kum 42 mi Venus chuan, "Mahni rama inkhelh hi chu a nuam bik, min ṭantu tam tak hmaa inkhelh aia nuam hi a awm thei tawh chuang lo ang. An duh leh beisei ang ka tihlawhtling thei lo erawh a pawi ka ti," tiin a sawi.