Match hmasaah Osaka a chak

May thla hnua a vawi khat nan Naomi Osaka chuan match hmasa ber a khel a, harsatna lian tak tawk loin Zheng Qinwen chu 6-4, 3-6, 6-1 in a hneh. Hun rei tak a inkhelh loh hnua a match hmasa a nih avangin duhthusam vek erawh a la ni lo.

Thawhlehni zan Mubadala Silicon Valley Classic inkhelah Osaka hian vawi 11 aces a aw chhuak a, a khingpuiin break point vawi riat a hmuh zinga pasarih chu a inchhanhim thei, insiamrem ngai lai a la awm nual.

Osaka hian May thla khan French Open a khel a, a match hmasa berah Amanda Anisimova a hneh lo - a hnu lamah tournament khel loin a awm vang vang, a ke artui hliam vangin Wimbledon pawh kha a khel thei lo.

Tunah chuan Osaka a dam leh tawh, a match lehpekah chuan Coco Gauff a tum dawn. American tleirawl Gauff hian Anhelina Kalinina chu 6-0, 6-1 in a lo hneh ve thung a ni.

Gauff leh Osaka hi tun hmain vawi thum an inhmachhawn tawh - Osaka hian 2-1 in hma a hruai mek, 2019 US Open-ah pawh khan Japanese nula zawk hian hnehna a chang a, tun ṭumah erawh rinkai zawk an awm bik lo ang.

US Open inbuatsaihna dang San Jose lamah Bianca Andreescu erawh a chak lo. Canadian nula hi Shelby Rogers lakah 6-4, 6-2 in a chak lo.