Leno-a'n Fulham a pan

German goalkeeper Bernd Leno chuan Arsenal aṭangin Fulham a zawm fel a, a man zat hi pound maktaduai 8 thlenga sang chho thei tur a ni ang - Premier League club tan hian season thum daih contract a ziak.

Kum 30 mi Leno hi Gunners tan rinrawl a ni ṭhin, mahse season hmasa khan Mikel Arteta-a'n Aaron Ramsdale a lei thar. England goalkeeper hian Leno hi a rawn nek chhuak a, Ramsdale an rin zawk avangin Leno hi match kuaah chiah a inlan a ni.

Kum 2018 khan Leno hian Bayer Leverkusen aṭangin Arsenal hi a zawm, pound maktaduai 20 man niin inelna hrang hrangah North London club tan match 125 a khelhsak hman a, goal chhuah lohna match 37 a nei hman.

Nipui bazarah Fulham an inthuam ṭha mek zel - Leno hma hian Joao Palhinha, Andreas Pereira, Kevin Mbabu leh Manor Solomon te an lalut tawh; Cottagers hian player panga an lei thar tawh tihna a ni.

German keeper Leno chuan, "Fulham ka zawm thei hi ka lawm, training neih thuai thuai a, match pangngai khelh hlan ka nghakhlel hle. A tirah kha chuan ngaihtuahna a buai ve deuh, tunah erawh engkim chinfel a ni ta," tiin a sawi.

Leno manah Fulham hian Arsenal chu pound maktaduai thum an pe phawt, a hnu lamah a khelh dan leh chetṭhat dan a zirin pound makatduai 5 dang hi chu pung chho thei leh tur a ni thung.