Liverpool-in nomawi chawi dawn

Premier League champion Liverpool chuan July 22 zana Chelsea an mikhual zawhah Premier League nomawi an dawng dawn a, hliam vanga chawl mek club captain Jordan Henderson chuan nomawi hi a chawi ang. 

Liverpool hian kum 30 hnua a vawi khat nan league nomawi an chawi a, Hendo hi kum 1990-a Alan Hansen hnua Liverpool captain league nomawi chawi leh hmasa ber a ni dawn tihna a ni. Hendo-a'n nomawi a chawi hma hian Liverpool legend Sir Kenny Dalglish chuan player-te hi Premier League medal a awrh tir phawt ang. 

Anfield-a nomawi hlanna hunah hian Covid-19 vangin fan-te chu an kal thei dawn lo a, mahse 'Kop Stand' hmingthang laihawl taka podium siamah fan-te banner siam chu tarchhuah a ni dawn thung. Liverpool chuan an fan-te chu Covid-19 darh zel tur ven nan in lama tawm hram hram turin an ngen a, in lam aṭangin an nomawi chawi lai hi an lawm mai a ngai dawn a ni. 

Merseyside club chuan thuchhuah siamin, "Fan-ten entu awm loa khelh mek inelna an chhim theih dawn loh avangin an tel ve theih dan tur ngaihtuah a ni a, banner mawi tak tak an siamte chu kan phochhuak dawn a ni," an ti. 

June-a Liverpool-in Premier League-a an champion an tih chian khan fans tam tak chu Anfield leh hmun dangah an pungkhawm a, club leh Liverpool khawpui mayor  Joe Anderson chuan 

fan-te chet dan hi an lo dem tawh.